Qazaqstan EO mańyzdy shıkizat resýrstarynyń tizbesine qosqan 34 mıneraldyń 21-imen qamtamasyz etýge ázir
ASTANA. KAZINFORM - Bul týraly Memleket basshysy Qasym-Jomart Toqaev «Qazaqstan – EO» dóńgelek ústelinde sóılegen sózinde málim etti.
Qasym-Jomart Toqaev elimizdiń asa mańyzdy mıneraldardy ıgerý baǵytynda Eýropaǵa senimdi seriktes bolýǵa daıyn ekenin málimdedi
– Qazaqstan EO asa mańyzdy shıkizat resýrstarynyń tizbesine qosqan 34 mıneraldyń 21-imen qamtamasyz etýge ázir. Osy áleýetti barynsha paıdalaný úshin biz «ofteık» negizindegi yntymaqtastyq jolyn usynamyz. Bul shıkizatty óz elimizde óńdep, qosylǵan quny joǵary óndiris tizbegin qurýǵa yqpal etedi. Sırek kezdesetin metaldar boıynsha óńirlik zertteý ortalyǵynyń qurylýy – atalǵan baǵyttaǵy seriktestiktiń nátıjesi. Sonymen qatar Qazaqstan jahandyq jańa energetıkalyq júıege kóshý bastamasyn ilgeriletýge qashanda yntaly. Ózderińizge málim, elimiz iri ýran óndirýshi retinde álemdegi suranystyń 40 paıyzǵa jýyǵyn qamtamasyz etedi. Munaı men gazdyń, kómirdiń aıtarlyqtaı qory bola tura, biz «jasyl» sýtegin óndirý jobasyn belsendi túrde qolǵa aldyq. Budan bólek, Qazaqstan aýmaǵynda lıtıı, nıkel, vanadıı jáne kobalttyń áli ıgerilmegen mol qory bar. Túptep kelgende, biz seriktesterge óte pragmatıkalyq formýla usynamyz: ıaǵnı strategııalyq resýrstarǵa qoljetimdilikti ınvestıtsııaǵa jáne tehnologııaǵa aıyrbastaýǵa nıettimiz. Bul tásil Eýropa standarttaryna tolyq saı keledi, – dedi Qasym-Jomart Toqaev.
Prezıdenttiń pikirinshe, Qazaqstan Eýropalyq Odaqty qýat kózderimen qamtamasyz etetin senimdi seriktes ári kepil el retinde strategııalyq pozıtsııasyn dáıekti túrde nyǵaıtyp keledi.
– Byltyr Eýropa naryǵyna tasymaldanǵan shıki munaıdyń 13 paıyzǵa jýyǵy Qazaqstanǵa tıesili. Biz eýropalyq seriktestermen jetkizý kólemin ulǵaıtý jáne óńirlik energetıkalyq qaýipsizdikti nyǵaıtý baǵytyndaǵy yntymaqtastyqty keńeıtýge árdaıym ázirmiz. Osyǵan baılanysty Kaspıı qubyr konsortsıýmynyń turaqty ári senimdi jumysyn qamtamasyz etý mańyzdy strategııalyq basymdyq bolyp qala beretinin aıtqym keledi, – dedi Memleket basshysy.
Osyǵan deıin Transkaspıı halyqaralyq kólik baǵdary boıynsha júk tasymaly keıingi 6 jylda bes ese óskeni týraly jazdyq.
