Qazaqstan EO elderimen vıza alý tártibin jeńildetý jóninde kelissózder júrgizýge daıyn
ASTANA. QazAqparat - Qazaqstan taraby Eýropalyq odaqqa múshe eldermen Qazaqstan Respýblıkasynyń azamattary úshin vıza alý tártibin jeńildetý jóninde kelissózder júrgizýge daıyn. Bul týraly jýrnalısterdiń suraǵyna jaýap bere otyryp, Qazaqstan Respýblıkasynyń Syrtqy ister mınıstri Erlan Ydyrysov málim etti.
«Eýropanyń shengen aımaǵyna toqtalar bolsaq, bizdiń qazirgi maqsatymyz tolyqtaı vızasyz rejım engizý emes. Qazirgi kelissózderdiń deńgeıi boıynsha biz azamattarymyz úshin vızany jeńildetýdi kózdep otyrmyz. Qazaqstan Respýblıkasynyń azamattary ózderin Eýropa elderinde vıza tártibin túgel saqtaıtyn azamattar retinde kórsetken, ıaǵnı, olardyń sapary vıza alýǵa bergen maqsatymen sáıkes keledi. Vızanyń ýaqyty aspaı, elge oralady. Sondyqtan, bizdiń kelissózder nátıjesin beredi dep oılaımyn»,-dedi Syrtqy ister mınıstrliginiń basshysy.
Bul rette, E.Ydyrysov málim etkendeı, Qazaqstan birqatar baǵyt boıynsha biraz jumysty aıaqtaý kerek. Atap aıtsaq, zamanaýı pasport úlgisin shyǵaryp, tıisti zań qabyldaýy kerek. Onyń artynda, shekaralyq baqylaý rejımine jáne shekara mańyndaǵy qylmyspen kúres máselesine qatysty suraqtar sheshilýi tıis. «Bul suraqtar bizdiń nazarymyzda, tipti, úkimettik josparymyz bar. Vedomstvoaralyq top jumysyn bastaǵan, sondyqtan, Eýropalyq odaqpen kelissóz júrgizýge daıynbyz. Eýropalyq odaq tıisti mandatyn alý kerek, sonda ǵana biz resmı túrde kelissózimizdi bastaı alamyz»,-dep túsindirdi E.Ydyrysov.
