Qazaqstan energııany únemdeýde Fınlıandııanyń tájirıbesin qoldanbaq

ASTANA. QazAqparat - Astanada búgin Fınlıandııanyń energetıkalyq kúni ótip jatyr. Jıynda qazaqstandyq energetıka salasy kásiporyndarynyń basshylary men Fınlıandııanyń «EKSPO-2017» kórmesindegi komıssary Severı Keınıalıa men fındik energetıka klýbynyń jetekshileri bas qosty, dep habarlaıdy «QazAqparat» HAA tilshisi.

Fınlıandııa tarapynan Severı Keınıalıa «EKSPO-2017» kórmesindegi Fınlıandııanyń pavılonyna bir aptada ǵana 2 myń adamnyń kelgenin habarlady. Onyń aıtýynsha, atalmysh pavılon qos taraptyń energetıkalyq sektory mamandaryna bas qosý úshin taptyrmas oryn bola alady. Keınıalıanyń sońynan fındik energetıka klýbynyń basqarýshy dırektory Esa Teppo vıdeo arqyly fındik energetıka júıesi qalaı jumys atqaryp turǵanyn kórsetti. Fındikter energetıkany qoldanýda barynshy únemdeýdi jolǵa qoıa bilgen. 

Eýropa tórindegi eldiń energetıkalyq kúnin atap ótýdiń negizgi maqsaty - fındik energetıkany paıdalanýdyń modelin zertteý. Fınlıandııa bıznes habtyń dırektory Muhtar Mankeev osylaı deıdi.

Onyń sózine súıensek, fındik model energetıkany tıimdi túrde qoldanýda halyqaralyq dárejede ózin moıyndatyp qoıǵan.

«Qazaqstan - 2050» strategııasynda álemniń damyǵan 30 eliniń quramyna ený úshin dál osy halyqaralyq dárejeni baǵyndyrýdy kózdep otyrmyz. Sol sebepti, biz alǵyr memleketterdiń tájirıbesin zerttep, olardyń modelderin úırenýimiz kerek. Bul baǵytta Fınlıandııa birshama alǵa shyǵyp ketken. Búgingi jıynda qurylǵylardy óndiretin, energııany únemdeýdi qolǵa alǵan 11 kásiporyn Qazaqstanǵa arnaıy kelip otyr. Al bizden energetıkalyq sektorda jumys atqaratyn 4 oblystan, eki mınıstrlikten jıyny 150 adamnyń kelip otyrǵany qýantady. Búgin Astana qalasynyń ákimdigi men fın energetıkalyq klýby ózara seriktestik jóninde memorandýaǵa qol qoıady», - deıdi M. Mankeev.

Onyń sózine súıensek, memorandýmnyń maqsaty -  energııany únemdeıtin tehnologııalarǵa qol jetkizý.

«Qaıtalap aıtamyn, fındik model - elektroenergııany barynsha únemdeýge baǵyttalǵan. Al bizde ózderińiz biletindeı, elektr energııasyn keıde esepsiz jumsap jatamyz. Mundaı shyǵyndardan fındik tarap baıaǵyda ketip qalǵan. Oılap qarasańyz, eki eldiń de ortalyqtandyrylǵan jylý júıesi birdeı. Bári de uqsas. Biraq shyǵatyn shyǵyn jaǵynan kórsetkishter ártúrli. Sondyqtan biz birlesken oqý semınaryn, qazaqstandyq kompanııalardyń Fınlıandııaǵa saparyn uıymdastyrýǵa kúsh salmaqpyz», - dep túıdi Fınlıandııa bıznes habtyń dırektory.