Qazaqstan energııa jetkizilimi turaqtylyǵynyń arqasynda óńirlik kóshbasshyǵa aınaldy - Mamın
NUR-SULTAN. QazAqparat - Qazaqstan energııa jetkizilimi turaqtylyǵynyń arqasynda óńirlik kóshbasshyǵa aınaldy. Bul týraly búgin XII Kazenergy Eýrazııalyq forýmynda QR Premer-Mınıstri Asqar Mamın aıtty, dep habarlaıdy QazAqparat tilshisi.
«Forýmda energetıka álemindegi eń mańyzdy máselelerdi talqylap, turaqtylyq salasyndaǵy qandaı da bir sheshimderdi ázirlep, bul sektordy odan ary ınnovatsııalaý múmkindikterin zerdeleımiz. Jalpy, energetıkada josparlaý deńgeıindegi belgili bir transformatsııa júrip jatyr. Búgingi kúni jahandyq tutyný qurylymy ózgeriske ushyraýda. Al bul ındýstrııany ózgertýdi talap etedi. Bizden qandaı da bir jańashyldyq talap etilip otyr», - dedi jıyndy ashqan Úkimet basshysy.
Onyń atap ótýinshe, qazirgi ýaqytta jahandyq ekonomıkanyń qarqyny ymyrasyz básekelestik jaǵdaıynda damyp kele jatyr. Qarjy sektorynda, sonymen qatar ındýstrııada aıtarlyqtaı quldyraý baıqalady. Al óńirlik turaqsyzdyq qaıtalanatyn qubylysqa aınalyp otyr.
«Qarjy-ekonomıka naryǵyndaǵy iri kúızelis bizdi jańaratyn energetıka kózderine nazar aýdarýǵa jáne ınfraqurylymdy bul sektordaǵy ınnovatsııalarǵa daıyndaýǵa májbúrlep otyr. Buǵan qosa, biz energetıka naryǵyndaǵy, sondaı-aq jahandyq ekonomıkadaǵy turaqtylyq pen aıqyndylyqty qoldap otyrýymyz kerek. Bul turǵyda Qazaqstannyń róli barynsha tanymal bolyp keledi. Biz energııa jetkizilimi turaqtylyǵynyń arqasynda óńirlik kóshbasshyǵa aınalyp otyrmyz. Astana EKSPO energııanyń jańa kózderin talqylaý úshin tamasha alań jáne múmkinshilik boldy. Sol ýaqytta beri biz jasyl ekonomıkaǵa daıyndalý jáne júzege asyrý bóliginde naqty sharalardy engizdik», - dedi Asqar Mamın.
