Qazaqstan energetıkteri: Jańa Konstıtýtsııa — el damýynyń bolashaq baǵytyn aıqyndaıtyn tarıhı qujat
ASTANA. KAZINFORM — Búgin Astanada Qazaqstan Elektroenergetıkalyq Qaýymdastyǵynyń uıymdastyrýymen jańa Konstıtýtsııa jobasyna arnalǵan kezdesý ótti. Shara barysynda Qazaqstannyń energetıkteri eldiń jańa Negizgi Zańyn qoldaıtynyn málimdedi.
Sharaǵa energetıkalyq kompanııalardyń qyzmetkerleri, kásipodaq uıymdarynyń ókilderi jáne QR Parlamentiniń depýtattary qatysty.
Beınebaılanys arqyly jıynǵa elimizdiń barlyq óńirlerinen energetıka kásiporyndarynyń óndiristik ujymdary qosyldy. Búginde elimizdiń energetıka salasynda 100 myńnan astam adam eńbek etedi.
Áriptesterine Qazaqstan Elektroenergetıkalyq Qaýymdastyǵy dırektorlar keńesiniń tóraǵasy Baǵdat Oral úndeý jasady.
— Negizgi Zańnyń jańa jobasy — memleket damýynyń bolashaq baǵytyn aıqyndaıtyn tarıhı qujat. Biz energetık retinde de, óz elimizdiń azamaty retinde de bul baǵytty qoldaımyz jáne eldegi ózgeristerdiń mańyzdylyǵyn tereń túsinemiz, — dedi ol.
Jıynǵa qatysýshylar jańa Konstıtýtsııanyń el ekonomıkasyn óz qolymen órkendetip jatqan jandar úshin qundylyǵyn atap ótti.
— Eńbek adamy, jumysshy mamandyqtarynyń ókilderi is júzinde memlekettiń irgeli qundylyqtary deńgeıine kóterilip otyr. Bul eńbekqorlyqty memlekettik damý prıntsıpteriniń biri retinde bekitý týraly tujyrymdamada aıqyn kórinis tapqan, ıaǵnı, eńbek, kásibılik jáne shyǵarmashylyq qyzmet konstıtýtsııalyq deńgeıde tanylyp, erekshe qurmetke ıe bolady, — dep atap ótti Qazaqstan Elektroenergetıkalyq Qaýymdastyǵynyń basqarma tóraǵasy Talǵat Temirhanov.
Sonymen qatar, «Ortalyq-Azııa Elektroenergetıkalyq Korporatsııasy», «Atyraý Jaryq» kompanııasy, «Almaty elektr stantsııalary» AQ jáne Ekibastuz 1-MAES qyzmetkerleri joba týraly óz pikirlerin bildirdi. Olar memlekettiń damýyna yqpal etetin jekelegen normalardyń, atap aıtqanda, adamı kapıtaldyń strategııalyq mańyzy, kepildikter men jaýapkershilik týraly aıtty. Spıkerler qaýipsizdik jáne qorshaǵan ortany qorǵaý máselelerine de erekshe toqtaldy.
QR Parlamenti Májilisiniń depýtaty Dúısenbaı Turǵanov ekologııa máselesiniń mańyzdylyǵyn atap ótti.
— Jańa Konstıtýtsııa jobasynda alǵash ret joǵary ekologııalyq mádenıetti qalyptastyrý memlekettiń irgeli prıntsıpi retinde bekitildi. Qorshaǵan ortany qorǵaý adam quqyqtaryn qorǵaýmen teń deńgeıge kóterildi. Qujatta jer jáne onyń qoınaýy, sý kózderi, ósimdikter men janýarlar dúnıesi, ózge de tabıǵı resýrstar halyqqa tıesili ekeni tikeleı jazylǵan. Bul jaı ǵana sóz emes — bul bárimizge júktelgen jaýapkershilik pen ortaq baǵdar, — dedi Dúısenbaı Turǵanov.
Qazaqstan energetıkteri Konstıtýtsııanyń jańartylǵan normalary zaman talabyna saı ekenin, olar ulttyq maqsattarǵa qol jetkizýge, memleket qaýipsizdigin qamtamasyz etýge jáne halyqtyń ómir súrý sapasyn arttyrýǵa múmkindik beretinin aıtty.
Kezdesý sońynda qatysýshylar barshany azamattyq belsendilik tanytyp, 15 naýryzda ótetin jalpyhalyqtyq daýys berýge qatysýǵa shaqyrdy.
Buǵan deıin Jan Železný (ıAn Jelezny) Qazaqstandaǵy konstıtýtsııalyq reforma eldiń halyqaralyq bedeline de yqpal etetinin aıtty.