Qazaqstan energetıkalyq sýsyndar ımportyn shekteýi múmkin
ASTANA. QazAqparat - QR Parlamenti Májilisiniń depýtattary elimizge energetıkalyq sýsyndardyń ákelinýin shekteýdi usynyp otyr. Olardyń aıtýynsha, jasóspirimderdiń ol sýsyndardy kóptep tutynýy saqtanarlyq jaǵdaıǵa jetkizgen, dep habarlaıdy «QazAqparat» HAA tilshisi.
Jalpy otyrysta Sáken Qanabekov QR Premer-Mınıstri Baqytjan Saǵyntaevqa depýtattyq saýal joldady.
«Qazaqstan-2050» strategııasynda Qazaqstan Prezıdenti Nursultan Nazarbaev: «Ulttyń densaýlyǵy - bizdiń jarqyn bolashaqtyń kepili» ekenin atap ótken bolatyn. Qazirgi ýaqytta elimizdegi medıtsınalyq qoǵamdastyqtar shekteý sharalaryna qaramastan, energetıkalyq sýsyndarǵa jasóspirimderdiń úıir bolýy elimizde tyıylmaı turǵanyn keltiredi. Qazaqstandyq mamandardyń oıynsha, energetıkalyq sýsyndar - psıhotropty zattek bolyp tabylady», - deıdi ol.
Depýtattyń aıtýynsha, energetıkalyq sýsyndardy tutyný turaqty túrde úırenýge ákelip, ortalyq júıke júıesiniń júdeýine ákelip soqtyrady. Quqyqqorǵaý organdary qyzmetkerleriniń deregine súıensek, osyndaı sýsyndardy tutynatyn jasóspirimder agressıvti ári tentek qylyqtarymen erekshelenedi. Úsh ese kóp temeki tartady, esirtkilik zattardy tutynady. Osynyń saldarynan qylmysqa barady.
«Sheteldik ǵalymdardyń zertteý jumysynyń nátıjesi kórsetip otyrǵandaı, energetıkalyq sýsyndardyń quramynda uıqysyzdyqty, tynyshsyzdyqty týdyryp, júrekke kúsh túsirip jáne ózge de aýrýlarǵa ákelip soqtyratyn zattardyń bary anyqtalǵan. Infektsııalyq emes dertterge qarsy Búkilálemdik densaýlyq saqtaý uıymy júrek-qan tamyrlary aýrýlaryn azaıtýdyń bir joly - energetıkalyq sýsyndardyń tutynýyn azaıtý degen tujyrymǵa súıenip otyr. Sondyqtan, damyǵan elderdiń kóbi energetıkalyq sýsyndardyń kelýin azaıtyp, tipti shektep jatqandar bar», - deıdi májilismen.
Sáken Qanabekov Qazaqstanda 2013 jylǵy 19 tamyzdaǵy Qazaqstannyń bas sanıtarlyq dárigeriniń qaýlysymen saı kelmeıtin komponetteri bar sýsyndy orta, arnaıy jáne joǵary oqý oryndarynda, balalar men jasóspirimderdiń buqaralyq sharalarynda tutynýǵa tyıym salynǵanymen, bular jetkiliksiz ekenin aıtady.
«Búgingi tańda energetıkalyq sýsyndardy oqý oryndarynan tys jerde balalar men jasóspirimder tutynyp júr. Al buqaralyq-mádenı sharalarǵa olar «otalǵan» kúıi keledi. Sondyqtan, elimizde energetıkalyq sýsyndardy ákelýdi shekteý baǵytynda taǵy da sharalardy qabyldap, ony tutynǵan jasóspirimder úshin ákimshilik jaýapkershilikti engizýdi, nemese ony ákelinýine tolyq toqtatýdy usynamyz», - dep túıdi depýtat.
