Qazaqstan energetıka salasynyń qabilettiligin arttyrýǵa basa mán beredi
ASTANA. KAZINFORM — Memleket basshysy Qasym-Jomart Toqaev Kazakhstan Energy Week — 2025 jáne XVI Eýrazııalyq KAZENERGY forýmy qatysýshylary men qonaqtaryna arnaıy úndeý joldady. Úndeýdi Premer-mınıstr Oljas Bektenov jarııa etti.
— Bul — bedeldi sarapshylar men bilikti mamandardyń energetıka salasyndaǵy ózekti máselelerdi talqylaıtyn alqaly jıyny. Qazir jańa tarıhı kezeń bastaldy. Túbegeıli ózgerister energetıka sektoryna da áserin tıgizip jatyr. Jahandyq syn-qaterler kóbeıip, halyqaralyq qatynastaǵy daǵdarystyń kúsheıýi, qalyptasqan logıstıkanyń buzylýy saldarynan álemdegi ahýal kúrdelene tústi. Osy almaǵaıyp kezeńde tıimdi yqpaldastyqtyń jańa tásilderin tabý barshanyń ortaq mindeti, — dedi Prezıdent úndeýinde.
Memleket basshysy ekonomıka, ǵylym, bilim, ınnovatsııa, ozyq tehnologııa sııaqty strategııalyq mańyzy bar salalardyń damýy qýaty kózderiniń qoljetimdi bolýyna tikeleı baılanysty ekenine nazar aýdartty.
— Sondyqtan biz elimizdiń energetıkalyq qaýipsizdigi men derbestigin nyǵaıta túsý úshin aýqymdy jobalardy júzege asyryp jatyrmyz. Osy mańyzdy iske halyqaralyq seriktesterimiz zor úles qosyp keledi. Qazaqstan energetıka salasyna ınvestıtsııa tartýǵa, onyń qabilettiligin arttyrýǵa basa mán beredi. Bul turǵydan alǵanda elimiz jaýapkershiligi joǵary orta derjava retinde BUU, ShYU, MAGATE, OPEK sııaqty bedeldi halyqaralyq uıymdarmen baılanysyn bekemdeı túsýge jáne jarqyn bolashaq úshin birlesip jumys isteýge múddeli. Forým aıasynda energetıka salasyn órkendetýge jol ashatyn tyń ıdeıalar men jasampaz bastamalar usynylady dep senemin, — dedi Qasym-Jomart Toqaev.
Aıta keteıik, forýmǵa Qazaqstan Úkimetiniń múshelerimen qatar, Ortalyq Azııa elderiniń resmı delegatsııalary, halyqaralyq uıymdardyń basshylary, álemdik jáne ulttyq energetıkalyq kompanııalardyń top-menedjerleri, jetekshi sarapshylar men ǵylymı orta ókilderi qatysyp jatyr. KEW-2025 búginde energetıka salasyndaǵy eń ózekti máselelerdi talqylap, jańa sheshimder usynatyn ári óńirlik jáne jahandyq yntymaqtastyqty nyǵaıtýǵa yqpal etetin mańyzdy halyqaralyq alań retinde erekshelenip otyr.
Bıylǵy is-sharaǵa 50-den astam memleketten 2,5 myńnan astam delegat pen 300-den astam iri kompanııanyń ókilderi jınaldy.