Qazaqstannyń energetıka salasynda tolaǵaı tabystarǵa jetetinine senemin – Vladımır Pýtın
ASTANA. KAZINFORM — Qazaqstannyń energetıka salasyn damytýǵa áleýeti zor. Bul jóninde Reseı Prezıdenti Vladımır Pýtın Peterbýrg halyqaralyq ekonomıkalyq forýmy aıasynda halyqaralyq agenttikterdiń ókilderimen kezdesýde málimdedi.
– Qazaqstan resýrstarǵa óte baı el ekenin atap ótkim keledi. Bul jerde atom elektr stantsııalarynyń otyny jóninde aıtyp otyrmyn. Bul baǵytta Qazaqstanmen seriktestigimiz tabysty, joǵary deńgeıde, – dedi ol QR Prezıdenti teleradıokesheniniń bas dırektory Raýshan Qajybaevanyń suraǵyna jaýap bere otyryp.
Reseı Prezıdentiniń aıtýynsha, atom energetıkasyn damytý arqyly Qazaqstan energııa alý kózderin ártaraptandyrady.
– Óziniń resýrstyq bazasyna súıenip ári birlesken áleýetti órkendetip, Qazaqstan energetıka salasynda tolaǵaı tabystarǵa jetetinine, kóptegen máseleni sheshetinine jáne energııa alý kózderin ártaraptandyratynyna senemin. Menińshe, aldaǵy ýaqytta Qazaqstan qajetti elektr energııasynyń 20%-yn atom elektr stantsııasynan alady, – dedi Vladımır Pýtın.
Sonymen birge, ol AES salý jańa energııa bloktaryn qamtamasyz etip qana qoımaı, tolyqqandy jańa salany quratynyn jetkizdi.
– Eń bastysy, jańa sektor qurylady. Ol kadr daıarlaý, ǵylymı zertteýler jáne óndiristi qamtıdy. Munyń bári birlesken jobalar. Bul baǵyt biz úshin de, Qazaqstan úshin de óte mańyzdy, – dedi Reseı Prezıdenti.
Sondaı-aq, ol memleketter ǵarysh, mashına qurastyrý jáne ýran óndirisi salalaryndaǵy yntymaqtastyqty da jalǵastyratynyn málimdedi.
Aıta keteıik, buǵan deıin Vladımır Pýtın Qazaqstan men Reseıdiń ortaq maqsatyn ataǵanyn jazǵanbyz.
