Qazaqstan energetıka salasyn Ózbekstan jáne Qyrǵyzstanmen birlese damytpaq
TAShKENT. KAZINFORM – Tashkentte Qazaqstan, Ózbekstan jáne Qyrǵyzstan sý-energetıkalyq vedomstvolarynyń basshylary úshjaqty kezdesý ótkizdi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Qazaqstandyq delegatsııany bastap kelgen QR Energetıka mınıstri Almasadam Sátqalıev kezdesý barysynda Ortalyq Azııa elderiniń energetıkalyq júıesin damytý usynystary qaralǵanyn aıtty.
«Basqosý barysynda kúzgi-qysqy kezeńderdegi energetıkalyq júıelerge túsetin joǵary júkteme, jańa sý elektr stantsııalaryn salý, Ortalyq Azııa elderiniń energetıkalyq júıelerin damytý máseleleri talqylandy. Onyń nátıjesi boıynsha birneshe mańyzdy sheshimder qabyldandy. Atap aıtqanda, apatty jaǵdaılar týyndaı qalǵanda ózara yntymaqtastyqa kómek kórsetý jáne ol úshin rezervtik kózderdi jasaqtaý tetikteri pysyqtaldy», - dep málim etti Almasadam Sátqalıev Kazinform tilshisiniń saýalyna jaýap bere otyryp.
Sondaı-aq taraptar byltyr ózderine mindettelgen elektr energııasyn jetkizý men ony óndirýge jumsalǵan sý kólemine qatysty josparlardyń qanshalyqty oryndalǵanyn da baıandady.
«Byltyr Qazaqstan qyrkúıek-jeltoqsan aılary aralyǵynda Qyrǵyzstanǵa jetkizýi tıis bolǵan elektr energııasynyń josparyn 108 paıyzǵa oryndady. Mindettemege saı, elimiz qyrǵyz tarapyna qyrkúıekten sáýirdiń sońyna deıin 1,5 mlrd kVt/saǵ elektr energııasyn jetkizýi kerek. Búginde qyrkúıek-qańtar aralyǵynda mejeli kólemniń 96 paıyzyn qamtyp úlgerdik. Endi aqpan-naýryzda jetispeı qalǵan 4 paıyz bóligin jabýdy kózdep otyrmyz. Munymen qatar ústimizdegi jyldyń jospary bekitildi. Oǵan sáıkes, Qazaqstan Qyrǵyzstanǵa 1,6 mlrd kVt/saǵ elektr energııasyn jetkizedi», - dedi «KEGOC» AQ Júıelik qyzmetter jáne ulttyq elektr torabyn damytý jónindegi basqarýshy dırektory Nurjan Kerimqulov.
Málim bolǵandaı, vedomstvo basshylarynyń kelesi kezdesýi sý elektr stantsııalaryn salý taqyrybyna arnalmaq. Onda taraptar Qyrǵyzstan aýmaǵynda salynyp jatqan Qambar ata stantsııasynyń jaı-kúıin talqylaıdy.
