Qazaqstan endi Eýroodaq naryǵyna bal eksporttaıdy
ASTANA. KAZINFORM – Eýropalyq Odaq Qazaqstandy bal eksporttaýshy el retinde resmı túrde maquldady.
Bul mańyzdy jetistik QR AShM Veterınarııalyq baqylaý jáne qadaǵalaý komıteti men Qazaqstan Respýblıkasynyń Brıýsseldegi Elshiliginiń, sondaı-aq Eýropalyq komıssııanyń Densaýlyq saqtaý jáne azyq-túlik qaýipsizdigi jónindegi Bas dırektoratynyń (DG SANTE) úılesimdi jumysynyń nátıjesi. Bul qazaqstandyq ónim úshin álemdegi eń iri jáne básekege qabiletti naryqtardyń birinde jańa múmkindikter ashady.
Eýropalyq Komıssııa EO 2021/405 erejesine Odaqqa balyq ónimderiniń jekelegen túrlerin ımporttaýǵa ruqsat etilgen úshinshi elderdiń tizimderine qatysty túzetýler engizetin 2025/354 erejesin (EO) jarııalady.
Reglamenttiń I qosymshasyna sáıkes Qazaqstan belgili bir janýarlardy azyq-túlik ónimderin óndirý úshin paıdalaný jáne adam tutynatyn janýar tektes ónimderdi baqylaý josparlary bekitilgen úshinshi elder nemese óńirler tizimine engizildi.
Osylaısha, Reglamenttiń 11-tarmaǵy Qazaqstan barlyq qajetti kepildikti usynǵanyn rastap, sonyń nátıjesinde onyń jospary maquldanǵanyn rastaıdy. Endi Qazaqstan (EO) 2021/405 Reglamentiniń I qosymshasynda «bal» úshin «X» belgisimen kórsetilgen, bul qazaqstandyq eksporttyń Eýropalyq Odaq naryǵyna jańa kókjıekterin ashýda.
Aıta ketetin jaıt, Reglament Eýropalyq Odaqtyń Resmı jýrnalynda jarııalanǵannan keıin jıyrmasynshy kúni kúshine enedi.
Bul sheshim Qazaqstan men EO arasyndaǵy saýda qatynastaryn keńeıtýdegi mańyzdy qadam bolyp sanalady. Ol akvaósirý, et jáne basqa da birqatar qazaqstandyq aýyl sharýashylyǵy ónimderin kelisý úrdisin jalǵastyrýǵa múmkindik berip otyr.
Syrtqy saýdany damytý Qazaqstan úshin basym mindet bolyp qala beredi. Al EO naryǵyna eksporttalatyn taýarlar assortımentin keńeıtý Qazaqstannyń sharýashylyq sýbektileri men eýropalyq ımporttaýshylar arasyndaǵy kommertsııalyq baılanystardyń nyǵaıýyna septigin tıgizedi.
Maqsatty jumystyń arqasynda buǵan deıin qazaqstandyq balyq ónimderine Eýropalyq Odaqqa jol ashylǵannyn atap ótken jón.
Eýroodaqqa múshe memleketterdiń biryńǵaı saýda saıasatyn retteý EO ınstıtýttary tarapynan júzege asyrylatyndyqtan qazaqstandyq eksportty ilgeriletý máselesi Qazaqstan Respýblıkasynyń Brıýsseldegi Elshiliginiń nazarynda.
Aıta keteıik, Eýropalyq Komıssııanyń málimeti boıynsha, Eýropalyq Odaq ózin balmen tek 63% deńgeıinde qamtamasyz ete alady. Sonymen qatar, Eýroodaq óndiris kólemi 286 myń tonnaǵa jetetin álemdegi Qytaıdan keıingi ekinshi eń iri bal óndirýshi.
Birikken Ulttar Uıymynyń Azyq-túlik jáne aýyl sharýashylyǵy uıymynyń (FAO) málimeti boıynsha, bal óndirýshi úsh iri el – Qytaı (474 myń tonna, 26%), EO (286 myń tonna, 16%) jáne Túrkııa (118 myń tonna, 6%).
Qazaqstannyń statıstıkalyq derekterine sáıkes 2023 jylǵy qorytyndy boıynsha eldegi bal óndirisiniń kólemi 3,9 myń tonna boldy. Onyń 228 tonnasy Qytaı, Saýd Arabııasy, Ózbekstan, Qyrǵyzstan, Birikken Arab Ámirlikteri jáne Iordanııaǵa eksporttaldy.