Qazaqstan eńbeksúıgish azamattar eli, Ádilet, Zań jáne Tártip aýmaǵy bolýy kerek — Prezıdent

QYZYLORDA. KAZINFORM – Qazaqstan patrıoty bolý — úlken azamattyq jaýapkershilik. Bul týraly Memleket basshysy Qasym-Jomart Toqaev Ulttyq quryltaıdyń V otyrysynda  málim etti.

— Bizge ulttyq múdde týraly tek uranmen sóıleıtinder, Otanǵa degen súıispenshilikti saıasat úshin paıdalanyp, jeke paıda tabýǵa tyrysatyn adamdardyń qajeti joq. Jaýapty jáne jasampaz patrıotızm — ár azamattyń ár salada, zaýyttar men aýyl sharýashylyǵynda, medıtsına mekemelerinde, mektepter men ýnıversıtetterde, ǵylymı zerthanalarda, memlekettik organdar men jeke kompanııalarda adal, qajyrly, kásibı eńbek etýi. Sondaı-aq bul áskerı qyzmette nemese qoǵamdyq tártipti qamtamasyz etýde Otanǵa adal bolý, — dedi Prezıdent.

Sonymen birge, Memleket basshysy Qazaqstan eńbeksúıgish azamattar eli, Ádilet, Zań jáne Tártip ornaǵan aýmaq bolýy keregin jetkizdi.

— Jasampaz eńbek pen zań pármeni joǵary mádenı dástúrlermen úılesip otyrýy da mańyzdy. Sebebi kóptegen elde bul qaǵıdalar tabys pen ál-aýqat formýlasyna aınalǵan. Osyndaı negizgi ómirlik qaǵıdalar men moraldyq baǵdarlar otbasy men mektepte qalyptasady. Sondyqtan bul negizgi ınstıtýttar árdaıym erekshe nazarda bolýy qajet, — dedi Qasym-Jomart Toqaev.

Aıta keteıik, Ulttyq quryltaıdyń V otyrysynyń mátin translıatsııasyn Kazinform saıtynan oqýǵa bolady.