Qazaqstan eńbek ónimdiligi jaǵynan damyǵan elderden 5 ese artta qalyp otyr - Erjan Birjanov

NUR-SULTAN. QazAqparat – Qazaqstan eńbek ónimdiligi jaǵynan damyǵan elderden orta eseppen 5 ese artta qalyp otyr. Bul týraly QR Eńbek jáne halyqty áleýmettik qorǵaý vıtse-mınıstri Erjan Birjanov aıtty, dep habarlaıdy QazAqparat tilshisi.

«Qazaqstan eńbek ónimdiligi jaǵynan damyǵan elderden orta eseppen 5 ese artta qalyp otyr. Eńbek naryǵynyń usynystary tarapynan onyń ósýi úshin negizgi tejeýshi faktorlar mynalar: birinshi - jumys kúshi quzirettiliginiń tómen deńgeıi. Ol eńbek naryǵyna qosylatyn jastarǵa da, qazirgi jumys kúshine de qatysty. Búgingi tańda eresekterdiń 79 paıyzy aqparattyq-kommýnıkatsııalyq tehnologııalar salasynda qarapaıym daǵdylardy ǵana meńgergen», - dedi vıtse-mınıstr Májiliste jumyskerlerdi qaıta oqytý jáne olardyń daǵdylaryn turaqty jetildirý jónindegi jańa tásilderge arnalǵan dóńgelek ústel otyrysy barysynda.

Erjan Birjanovtyń aıtýynsha, ekinshiden jumyskerlerdiń daǵdylaryn damytý úzdiksiz júrgizilmeıdi.

«Tehnologııalar ózgergende, eńbek fýnktsııalary transformatsııalanǵanda eńbek resýrstary sol qalpyna qalyp otyr. Olardyń daǵdylary, ásirese, óndiristi jańartý kezinde jumys oryndaryna saı kelmeıdi. Eresek turǵyndardyń tek qana 17 paıyzy óz biliktiligin arttyrady. Aıta keter bolsaq, Ekonomıkalyq yntymaqtastyq jáne damý uıymynyń baǵalaýynsha, basqa memleketterde osy kórsetkish 47 paıyzdy quraıdy. Sondyqtan eńbek naryǵynda teńgerimge qol jetkizý osy jaǵdaılardy eskerý qajet», - dedi ol.