Qazaqstan eńbek naryǵynda sońǵy 20 jylda halyqtyń jumyspen qamtylýynda aıtarlyqtaı qurylymdyq ózgerister boldy - Ctatıstıka agenttigi
ASTANA. 6 sáýir. QazAqparat / - Statıstıka agenttiginiń baspasóz qyzmeti taratqan málimetterge súıensek, Qazaqstannyń eńbek naryǵynda sońǵy 20 jylda halyqtyń jumyspen qamtylýynda aıtarlyqtaı qurylymdyq ózgerister boldy.
Atap aıtqanda, agenttik málimetterine sáıkes, 2010 jyly respýblıka ekonomıkasynda 8,1 mln. adam jumyspen qamtylsa, bul kórsetkish boıynsha 1991 jylǵa qaraǵanda, olardyń sany 398,0 myń adamǵa nemese 5,2 paıyzǵa joǵary. Al jaldamaly qyzmetkerlerdiń sany ótken jyly 5,4 mln. adamdy qurady. Bul saladaǵy jumysshylar 1991 jyly 7,4 mln. adam bolatyn. Sonymen qatar, óz betinshe jumyspen qamtylǵandardyń sany 2010 jyly 2,7 mln. adamǵa, al 1991 jyly 0,3 mln. adamǵa jetken edi.
Budan bólek, 2010 jyly jumyssyz halyqtyń sany 496,5 myń adamdy qurady, bul 1994 jylǵa qaraǵanda 39,9 myń adamǵa nemese 7,4 paıyzǵa az. Byltyr jumyssyzdyq deńgeıi 5,8 paıyzdy qurasa, 1994 jyly bul kórsetkish 7,5 paıyz edi. Sonymen birge, sońǵy 20 jyldy salystyryp qaraǵanda 1999 jyly elde eń joǵarǵy jumyssyzdyq deńgeıi belgilengen. Bul - 13,5 paıyzdy nemese 950,0 myń adamdy qurapty.
Qazaqstan Respýblıkasy Eńbek jáne halyqty áleýmettik qorǵaý mınıstrliginiń jumyspen qamtý organdarynda 2010 jyldyń sońyna 35,4 myń adam resmı tirkelgen. Osy tirkelgen jumyssyzdar úlesi ekonomıkalyq turǵydan belsendi halyqtyń 0,4 paıyzyn quraıdy. Bul kórsetkish 1994 jyly - 1,1 paıyz bolatyn.
