Qazaqstan eń tómengi jalaqyny halyqaralyq konventsııaǵa sáıkes saqtaıtyn bolady
ASTANA. QazAqparat - Búgin Parlament Senatynyń jalpy otyrysynda palata depýtattary «Eń tómengi jalaqyny belgileý rásimin jasaý týraly konventsııany (26-konventsııa) ratıfıkatsııalaý týraly» QR Zańyn qabyldady. Eń tómengi jalaqyny belgileý rásimi týraly konventsııa Halyqaralyq eńbek uıymynyń Bas konferentsııasynyń 1928 jyldyń 16 maýsymynda Jenevada jasalǵan bolatyn.
Qujattyń maqsaty eń tómengi jalaqyny belgileý rásiminiń ımplementatsııasy jónindegi mindettemelerdi memleketke bekitip berý bolyp tabylady. Sonymen qatar, Konventsııany qabyldaǵan memleket eń tómengi jalaqyny belgileý rásimin saqtaý quqyǵyn qamtamasyz etedi. Bul rette árbir memleket jalaqyny ujymdyq shart arqyly nemese ózge de jolmen tıimdi retteýdiń belgili rásimi bolmaǵan jáne jalaqysy óte tómen ónerkásiptiń belgili bir salalarynda (atap aıtqanda úı sharýashylyǵynda) jumys isteıtin eńbekshiler jalaqysynyń eń tómengi mólsherlerin belgileýge mindetteledi. «Elimizdiń aǵymdaǵy jaǵdaıy jáne uzaq merzimdi damý mindetterimen baılanysty qolda bar múmkindikter, tıimdilik pen qajettilik osy konventsııany qabyldaýdyń negizdemeleri bolyp tabylady. Sonymen qatar, jalaqynyń eń tómengi mólsherin belgileý jáne tóleý Qazaqstannyń Konstıtýtsııasynda belgilengen asa mańyzdy áleýmettik kepildikterdiń qataryna jatady. Budan bólek, elimizde eńbekaqyny tóleý kepildikteri men eń tómengi jalaqyny belgileý rásimi Eńbek kodeksimen rettelgen jáne ekonomıkanyń barlyq salalarynyń qyzmetkerleri úshin birdeı bolyp tabylady», - dedi Eńbek jáne halyqty áleýmettik qorǵaý mınıstri Tamara Dúısenova. Jalpy, konventsııa boıynsha eń tómengi mólsherlemeler qoldanylatyn jáne jalaqyny anaǵurlym tómen mólsherlemeler boıynsha alǵan jumysshy ózine tolyq tólenbegen somany sot tártibimen alýǵa quqyǵy qaralady.
