Qazaqstan eń tómengi zeınetaqy tólemderi boıynsha TMD-da birinshi orynda tur
ASTANA. 20 qyrkúıek. QazAqparat - Eń tómengi zeınetaqy tólemderi boıynsha Qazaqstan barlyq TMD memleketteriniń aldynda tur.
Búgin Májilistiń Áleýmettik-mádenı damý komıtetiniń otyrysy barysynda Eńbek jáne halyqty áleýmettik qorǵaý mınıstriniń orynbasary Serik Ahmetov osylaı málim etti.
«Zeınetaqy tólemderin júıeli túrde arttyryp otyrý eń aldymen jurtshylyqtyń ómir súrý deńgeıin TMD elderimen salystyrǵanda birshama arttyrdy. Máselen, eń tómengi zeınetaqy tólemderi boıynsha Qazaqstan barlyq TMD memleketteriniń aldynda tur. Atap aıtqanda, bizdiń kórsetkishimiz 163 dollardy quraıdy. Al Reseıde - 94 dollar. Al zeınetaqynyń nomınaldy tólemi boıynsha Qazaqstannyń kórsetkishi 248 dollardy qurap, 288 dollardy quraıtyn Reseıden ǵana qalyp otyrmyz», - deıdi S. Ahmetov. Degenmen, vıtse-mınıstrdiń aıtýynsha, Reseıdiń soltústik aımaǵyndaǵy zeınetaqy tóleminde tabıǵı-klımattyq jaǵdaılarǵa qatysty kóptegen ústeme tólemder bar.
