Qazaqstan eń aldymen óziniń adamdarymen maqtanýy tıis - serbııalyq baıqaýshy
ASTANA. QazAqparat - Qazaqstan eń aldymen óziniń adamdarymen maqtanýy tıis . Bul pikirdi búgin QR Ortalyq saılaý komıssııasynda ótken brıfıngte Serbııa Respýblıkasy Ulttyq assambleıasynyń depýtaty Dragomır Karıch bildirdi.
«Men Qazaqstandy jaqsy bilemin. Kezinde Kaspııde, Pavlodar, Qaraǵandy, Almaty qalalarynda jumys istegen edim. Serbııada menen Qazaqstan jaıynda suraǵan kezde osy jerde júzege asyrylyp jatqan ıgi isterdiń tek 10 paıyzyn ǵana aıtyp beremin. Men olarǵa sizder oılaǵandaı Qazaqstan gaz, munaı, altyn, kómir, metallýrgııa emes, eń aldymen ıntellektýaldy resýrs deımin. Bul ákimshilik resýrstar, bul bilim, bul joǵary oqý oryndary, mektepter men áleýmettik qamtý», - dedi Karıch.
Sonymen qatar ol Qazaqstan eń aldymen adamdarymen, el bolashaǵynyń lokomotıvi bolyp sanalatyn jastarymen maqtanýy tıistigin basa aıtty.
