Qazaqstan emhanalarynda pedıatrııalyq ýchaskeler qaıta jumys isteıdi
ASTANA. KAZINFORM — Qazaqstanda balalarǵa alǵashqy medıtsınalyq kómek kórsetýde pedıatrlardyń róli kúsheıtiledi. Densaýlyq saqtaý uıymdarynyń shtat normatıvterine engizilgen ózgerister pedıatrııalyq ýchaskelerdi saqtaýǵa múmkindik beredi. Nátıjesinde qajetti mamandar bolǵan jaǵdaıda balalar óz emhanasynda pedıatrdyń turaqty baqylaýynda bola alady.
Qazaqstanda emhanalardaǵy balalarǵa medıtsınalyq kómek kórsetý tártibine qatysty mańyzdy ózgeris engizildi. Endi balalarǵa alǵashqy medıtsınalyq kómekti pedıatrlar kórsetý múmkindigi saqtalady.
Bul úshin densaýlyq saqtaý uıymdaryndaǵy pedıatrııalyq ýchaskelerdi saqtaýǵa múmkindik beretin ózgerister engizildi.
Naqty qandaı ózgeris boldy?
Buǵan deıin qoldanysta bolǵan talap boıynsha 2027 jylǵy 1 qańtarǵa deıin emhanalardaǵy pedıatr dárigerlerdiń ornyn jalpy praktıka dárigerleri tolyq almastyrýy kózdelgen bolatyn.
Endi bul talap alynyp tastaldy.
ıAǵnı emhanalarda balalarǵa qyzmet kórsetetin pedıatrııalyq ýchaskelerdi saqtaýǵa jáne qajetti mamandar bolǵan jaǵdaıda balalardy pedıatrlarǵa bekitýge múmkindik bar.
Bul — ata-analar úshin balasyna medıtsınalyq kómek alýdyń úırenshikti ári túsinikti baǵyty saqtalady degen sóz.
Bul bala men ata-anaǵa ne beredi?
Bala tirkelgen emhanada pedıatrdyń turaqty baqylaýynda bola alady. Dáriger balanyń densaýlyǵyn týǵannan bastap júıeli túrde qadaǵalap, onyń ósýi men damýyn baǵalaıdy.
Pedıatr balanyń damýyndaǵy aýytqýlardy nemese densaýlyǵyndaǵy máselelerdi erte anyqtap, qajet bolǵan jaǵdaıda qosymsha tekserýge nemese beıindi mamanǵa jiberedi.
Osynyń arqasynda ata-anaǵa ár másele boıynsha qaıda júginý kerektigin túsiný ońaıyraq bolady: alǵashqy medıtsınalyq kómek — óz emhanasynda, qajet bolǵan jaǵdaıda ári qaraıǵy tekserý men emdeý tıisti mamandar arqyly júrgiziledi.
Nelikten pedıatr mańyzdy?
Balalar aǵzasynyń erekshelikterin jáne balanyń jasyna baılanysty damý kezeńderin pedıatr jaqsy biledi. Sondyqtan balanyń densaýlyǵyn turaqty baqylaýda pedıatrdyń orny erekshe.
Pedıatrııalyq ýchaskelerdi saqtaý:
- balanyń densaýlyǵyn týǵannan bastap júıeli baqylaýǵa;
- aýrýlar men damý buzylystaryn erte anyqtaýǵa;
- profılaktıkalyq tekserýlerdi sapaly júrgizýge;
- qajet bolǵan jaǵdaıda balany beıindi mamandarǵa der kezinde jiberýge;
- medıtsınalyq kómekti balanyń turǵylyqty jerine barynsha jaqyn uıymdastyrýǵa múmkindik beredi.
Pedıatrlar sany da artady
Pedıatrııalyq qyzmetti saqtaý úshin tek shtat máselesin sheshý jetkiliksiz. Eń bastysy — bilikti mamandardyń bolýy.
Vedomstvonyń málimetinshe, osyǵan baılanysty memleket pedıatrlardy daıarlaýdy da kúsheıtip otyr. Dáriger-pedıatrlardy daıarlaý qoldanystaǵy oqý baǵdarlamalaryna sáıkes júrgiziledi.
Bul bolashaqta balalarǵa medıtsınalyq kómek kórsetetin mamandar sanyn arttyrýǵa jáne pedıatrııalyq qyzmettiń kadrlyq áleýetin nyǵaıtýǵa baǵyttalǵan.
Eń bastysy — balaǵa medıtsınalyq kómektiń qoljetimdi bolýy
Engizilgen ózgeristerdiń negizgi maqsaty — pedıatr men jalpy praktıka dárigeriniń arasynan tańdaý jasaý emes, balanyń qajetti medıtsınalyq kómekti ýaqytyly jáne sapaly alýyna jaǵdaı jasaý.
Mınıstrliktiń dereginshe, pedıatr ýchaskesi jumys istese, bala óz emhanasynda pedıatrdyń turaqty baqylaýynda bolady. Al qosymsha dıagnostıka nemese mamandandyrylǵan kómek qajet bolsa, bala tıisti medıtsınalyq uıymǵa nemese beıindi mamanǵa jiberiledi.
Osylaısha, jańa ózgerister balalarǵa kórsetiletin alǵashqy medıtsınalyq kómekti kúsheıtip, pedıatrııalyq qyzmetti saqtaýǵa jáne damytýǵa múmkindik beredi.
Ata-analar úshin bul — balanyń densaýlyǵyn óz emhanasynda, pedıatrdyń turaqty baqylaýymen qadaǵalaý múmkindigin saqtaý.
Buıryq jobasy áleýmettik-ekonomıkalyq, quqyqtyq jáne ózge de teris saldarǵa ákep soqpaıdy.
Qujat «Ashyq NQA» portalynda 18 qyrkúıekke deıin qoǵamdyq talqylaýǵa shyǵaryldy.
Eske sala keteıik, balalardyń densaýlyǵyn saqtaý qyzmetin odan ári damytý pedıatrlar men jalpy praktıka dárigerleriniń jumysyn úılestiretin, sonymen qatar pedıatrııalyq ýchaskelerdi saqtaýdy kózdeıtin balalarǵa medıtsınalyq kómek kórsetýdiń gıbrıdti modelin kezeń-kezeńimen engizý negizinde júzege asyrylyp jatqanyn jazdyq.
