Qazaqstan elshisi Halyqaralyq teńiz uıymynyń ókilimen ne týraly sóılesti
ASTANA. KAZINFORM - Qazaqstan Respýblıkasynyń Ulybrıtanııadaǵy Elshisi Álibek Baqaev Halyqaralyq teńiz uıymynyń (HTU) Bas hatshysy Arsenıo Domıngespen kezdesý ótkizdi, dep habarlaıdy QR Syrtqy ister mınıstrliginiń baspasóz qyzmeti.
Taraptar Qazaqstannyń HTU-men yntymaqtastyǵynyń qazirgi jaı-kúıi men damý perspektıvalaryn talqylady. Á.Baqaev Qazaqstannyń Uıymmen ózara is-qımyldy odan ári keńeıtýge múddeli ekenin atap ótti.
Kaspıı teńiziniń halyqaralyq kólik-logıstıkalyq tizbekterdiń mańyzdy býyny retindegi strategııalyq róline erekshe nazar aýdaryldy.
Transkaspıı halyqaralyq kólik marshrýtynyń teńiz ýchaskesin damytý, Kaspıı arqyly júk tasymaldaý kólemin ulǵaıtý, sondaı-aq Aqtaý jáne Quryq porttarynyń ınfraqurylymyn jańǵyrtý Ortalyq Azııa, Qytaı jáne Eýropa elderi arasyndaǵy saýda-ekonomıkalyq baılanystardy damytý úshin jańa múmkindikter ashatyny atap ótildi.
Óz kezeginde, HTU Bas hatshysy A.Domınges odan ári ózara is-qımyldyń keń aýqymdy baǵyttary bar ekenin atap ótip, Uıymnyń Qazaqstanǵa tehnıkalyq yntymaqtastyq, sondaı-aq halyqaralyq teńiz standarttaryn ımplementatsııalaý jáne qoldaný salalarynda qoldaý kórsetýge daıyn ekenin rastady.
Kezdesý barysynda Qara teńizdegi jaǵdaıǵa da erekshe nazar aýdaryldy. Á.Baqaev saýda kemeleriniń, onyń ishinde qazaqstandyq munaı tasymaldaıtyn tankerlerdiń qaýipsizdigin qamtamasyz etýdiń mańyzdylyǵyn atap ótti.
Osyǵan baılanysty Qazaqstannyń syrtqy saýda múddeleri men halyqaralyq energetıkalyq qaýipsizdik úshin mańyzdy bolyp tabylatyn teńiz qatynasy men teńiz marshrýttarynyń turaqtylyǵyn qamtamasyz etýge múddelilik bildirildi.
A.Domınges óz kezeginde Qazaqstannyń ustanymyn qoldap, azamattyq jáne saýda kemeleriniń qaýipsizdigi men qorǵalýyn qamtamasyz etýdiń prıntsıpti mańyzdylyǵyn atap ótti. Ol HTU budan ári de teńiz qatynasynyń qaýipsizdigin qamtamasyz etý qaǵıdattaryn saqtaý jáne azamattyq teńiz kóligin qorǵaý máselelerinde dáıekti ustanymyn jalǵastyratynyn atap ótti.
Kezdesý qorytyndysy boıynsha taraptar ózara is-qımyldy damytý jónindegi jumysty jalǵastyrýǵa jáne Qazaqstannyń HTU qyzmetine qatysýy aıasynda naqty praktıkalyq nátıjelerge qol jetkizýge basa nazar aýdarýǵa ýaǵdalasty.
Halyqaralyq teńiz uıymy (HTU) — Birikken Ulttar Uıymynyń keme qatynasynyń qaýipsizdigi men qorǵalýyn qamtamasyz etý, kemelerden teńiz ortasynyń lastanýyn boldyrmaý, sondaı-aq halyqaralyq teńiz kóligine qatysty basqa da máseleler salasyndaǵy halyqaralyq normalar men standarttardy ázirleýge jáne jetildirýge jaýapty mamandandyrylǵan mekemesi.
Qazaqstan Respýblıkasy HTU-ǵa 1994 jyldan beri múshe. HTU-men ózara is-qımyldy keńeıtý Qazaqstannyń halyqaralyq kólik-logıstıkalyq tizbekterdegi róliniń artýy jáne Transkaspıı halyqaralyq kólik marshrýtynyń damýy jaǵdaıynda erekshe mańyzǵa ıe.
Aıta keteıik, Qazaqstannyń Halyqaralyq sý uıymyn qurý bastamasy ShYU sammıtinde aıtyldy.
