Qazaqstan elshiligi AQSh-ta júrgen qazaqstandyqtarǵa eskertý jasady

ASTANA. KAZINFORM — AQSh-taǵy mıgratsııalyq saıasattyń qatańdatylýyna baılanysty Qazaqstan elshiligi shetelde qujatsyz, vızasyz júrgen qazaqstandyqtarǵa eskertý jasady.

QR AQSh-taǵy Elshiligi Amerıka Qurama Shtattary shekara qaýipsizdigin nyǵaıtý jáne zańsyz mıgratsııany azaıtý maqsatynda mıgratsııalyq saıasatyn barynsha qatańdatqanyna nazarlaryńyzdy aýdarady.

Shekara qaýipsizdigin nyǵaıtýǵa jáne zańsyz mıgratsııany azaıtýǵa baǵyttalǵan sharalar elge zańsyz kelgen sheteldikterge (vızasyz kelgen jáne turaqty turýǵa ruqsaty joq azamattar) jáne AQSh-ta zańsyz júrgen mıgranttarǵa qatysty bolyp otyr. Qamaýǵa alý jáne elden shyǵarý syndy májbúrleý sharalarymen qatar, AQSh-qa qaıta kirýge shekteýler engizilip, sondaı-aq áleýmettik kómek, jumys isteýge ruqsat beretin qujattar men basqa da áleýmettik jeńildikterdi joıý qarastyrylýda.

— AQSh bıligi zańsyz negizde júrgen sheteldikterge (qujaty joq, jaramsyz vıza men turaqty turýǵa ruqsaty (Grın Karta) jáne basqa qujattar bolmaýy) elden óz erkimen ketýge múmkindik berip otyr. Bul shara Qazaqstan azamattarynyń deportatsııaǵa ushyraý qaýpin azaıtýǵa jáne onyń saldarynan bolashaqta AQSh vızasyna ótinish bergende el aýmaǵyna kirýge tyıym salynýynan saqtanýǵa kómektesedi, — delingen habarlamada.

Taǵy birqatar ózgeristerdi atap ótýge bolady:

1. «Meksıkada qalyńyz» saıasaty qaıta engizildi, ıaǵnı mıgranttar jáne saıası baspana suraıtyndar mıgratsııalyq sotqa shaqyrǵanǵa deıin Meksıkada qalýǵa mindetteledi;
2. «Usta da jiber» (catch and release) sharasy toqtatyldy. Bul AQSh shekarasynan zańsyz ótken mıgranttar isi qaralmaıynsha qamaýda bolatyndyǵyn bildiredi. Olardy arnaıy ortalyqtarǵa qamap nemese birden kelgen elderine qaıtaratyn bolady. Sonymen qatar azamattar úshinshi elderge de jiberilýi múmkin (mysaly, «Meksıkada bolý» baǵdarlamasy boıynsha);
3. Shartty túrde ýaqytynan erte bosatatyn nemese AQSh-qa kirýge aldyn ala jeńildikter qarastyrylǵan «CBP One» mobıldik qosymshasy jumysyn toqtatty.

AQSh kóshi-qon zańnamasyndaǵy ózgerister týraly resmı aqparatty kelesi resýrstardan baqylap otyrýdy usynamyz:

— AQSh azamattyǵy jáne ımmıgratsııa qyzmeti (USCIS);

— AQSh Memlekettik departamenti — Konsýldyq máseleler bıýrosy

Tótenshe jaǵdaılar nemese konsýldyq-quqyqtyq kómek qajettiligi týyndaǵan jaǵdaıda, tómendegi baılanys nómirlerine habarlasýdy suraımyz:

• Qazaqstan Respýblıkasynyń Elshiligi: [phone] ishki 127, 109, 121;
• QR Nıý-Iork qalasyndaǵy Bas konsýldyǵy: [phone];
• QR San-Frantsısko qalasyndaǵy Bas konsýldyǵy: [phone].

Eske salsaq, Donald Tramp ókilettiginiń úshinshi kúninde AQSh-tyń ońtústik shekarasyn zańsyz ımmıgranttar úshin jaýyp, olardy deportatsııalaýdy ulǵaıtýǵa baǵyttalǵan jarlyqtardy bekitti.