Qazaqstan Elshisi Jańa Zelandııanyń General-gýbernatoryna senim gramotalaryn tapsyrdy

VELLINGTON. QazAqparat – Qazaqstan Respýblıkasynyń Sıngapýr, Jańa Zelandııada jáne Aýstralııa Odaǵyndaǵy Elshisi Arken Arystanov Jańa Zelandııanyń General-gýbernatory Petsı Reddıge senim gramotalaryn tapsyrdy, dep habarlaıdy QazAqparat.

«Rásim onlaın formatynda eki el tarıhynda alǵashqy ret ótkizildi. Suhbat barysynda Qazaqstan Elshisi Petsı Reddı men Jańa Zelandııanyń halqyna Qazaqstan Respýblıkasynyń Prezıdenti Qasym-Jomart Toqaevtyń atynan izgi tilekterin jetkizdi.

A.Arystanov bıyl Qazaqstan men Jańa Zelandııanyń dıplomatııalyq qarym-qatynastaryna 28 jyl tolǵanyn atap ótti. Eki el arasyndaǵy qarym-qatynastar ortaq múddelerge negizdelgen jáne ony odan ári keńeıtý úshin aıtarlyqtaı áleýetti kórsetip otyr. Qazaqstan saýda-ekonomıkalyq yntymaqtastyqty, sondaı-aq adamdar arasyndaǵy baılanystardy jandandyrýǵa tyrysýda. Memlekettik sektordy reformalaý, tıimdi ekonomıkalyq basqarý jáne Jańa Zelandııadaǵy adamı kapıtalyn damytý Qazaqstan úkimeti úshin erekshe qyzyǵýshylyq týdyrady. Klımatty qorǵaý, jańartylatyn energııa, aýyl sharýashylyǵy jáne tehnologııalar transferti sııaqty salalardaǵy odan ári yntymaqtastyqtyń da áleýeti zor», - delingen QR Syrtqy ister mınıstrliginiń aqparatynda.

Óz kezeginde Petsı Reddı Qazaqstandy aýqymdy saıası jáne ekonomıkalyq jetistikterimen quttyqtap, eki el arasyndaǵy qatynastardyń dostyq jáne syndarly sıpatyn atap ótti. General-gýbernator óz sózinde saýda-ekonomıkalyq jáne ınvestıtsııalyq seriktestikti keńeıtýge, sondaı-aq kópjaqty yntymaqtastyqty tereńdetýge ózara qyzyǵýshylyqty basa aıtqan.

Sondaı-aq P. Reddı pandemııanyń jaqyn arada aıaqtalýyna úmit bildirip, Qazaqstan Elshisin 2021 jylǵy 6 aqpanda ótkiziletin eldiń Ulttyq kúnin atap ótý úshin Jańa Zelandııaǵa shaqyrdy.