Qazaqstan Elshisi Túrkııa vıtse-prezıdentimen strategııalyq yntymaqtastyq máselelerin talqylady

ANKARA. QazAqparat - Qazaqstannyń Túrkııadaǵy Elshisi Abzal Saparbekuly Túrkııanyń vıtse-prezıdenti Fýat Oktaımen kezdesý barysynda baýyrlas memleketter arasyndaǵy ekijaqty jáne kópjaqty strategııalyq yntymaqtastyq máselelerin talqylady. Bul týraly QR Syrtqy ister mınıstrliginen málim etti, dep habarlaıdy QazAqparat.

Atap aıtqanda taraptar Qazaqstan-Túrkııa úkimetaralyq ekonomıkalyq komıssııasynyń 11-shi otyrysynda qol jetkizilgen ýaǵdalastyqtardyń oryndalý barysyn jáne komıssııanyń kelesi kezdesýiniń merzimin sózetti.

«Sondaı-aq, aldaǵy ýaqytta Túrkistanda ótedi dep josparlanǵan Túrkitildes memleketter basshylarynyń beıresmı Sammıti, eki eldiń ózara ınvestıtsııalyq yntymaqtastyǵyn arttyrý joldary, ekijaqty ınvestıtsııany yntalandyrý úshin qosymsha mehanızmderdi qarastyrý jáne Qazaqstan men Túrkııa arasynda ózara esport-ımporttyq tıisti kelisimsharttardy pysyqtaý máseleleri kezdesýdiń basty taqyryptary boldy», - dedi QR SІM-nen.

Álemdik saýdanyń tómendeý úrdisine qaramastan, eki el basshylarynyń tyǵyz ári senimdi baılanystarynyń arqasynda saýda-ekonomıkalyq jáne ınvestıtsııalyq qatynastar damýynyń oń dınamıkada ekenin atap ótken A.Saparbekuly, bıyl eki el yntymaqtastyǵy budan da jaqsy kórsetkishterge ıe bolatyndyǵyna úmit bildirdi.

«F.Oktaı baýyrlas elder arasyndaǵy saýda kólemin Memleket basshylary bekitken qysqa merzimde 5 mlrd AQSh dollary mejesine jetkizý boıynsha qarqyndy jumystardy jalǵastyrý mańyzyna basa nazar aýdardy.

Kezdesý nátıjesinde Qazaqstan-Túrkııa úkimetaralyq ekonomıkalyq komıssııa ýaǵdalastyqtaryn jedel túrde iske asyrý maqsatynda jýyrda eki eldiń tıisti mınıstrlikteri arasynda vıdeokezdesýler ótkizý josparlanýda», - delingen mınıstrlik aqparatynda.

Aıta keteıik, 2020 jyldyń 11 aıynda eki el arasyndaǵy saýda aınalymy 2,8 mlrd AQSh dollaryn qurady. Qazaqstanǵa tartylǵan túrkııalyq ınvestıtsııa kólemi úshinshi toqsanda 282,5 mln AQSh dollaryna jetti.