Qazaqstan Elshisi Túrikmenstan Prezıdentine senim gramotalaryn tabystady

AShHABAD. QazAqparat - Qazaqstan Respýblıkasynyń Túrikmenstandaǵy Elshisi Erkebulan Sápıevti senim gramotalaryn tabystaý úshin Túrikmenstan Prezıdenti Gýrbangýly Berdimuhamedov qabyldady. Bul týraly QR Syrtqy ister mınıstrliginen málim etti, dep habarlaıdy QazAqparat.

«Oǵyzhan» saraıynda ótken kezdesý barysynda Túrikmenstan basshysy baýyrlas elder arasynda qalyptasqan dostyq qarym-qatynastar men ózara senim ahýalyn, sondaı-aq óńirlik jáne jahandyq kún tártibindegi negizgi máseleler boıynsha eki memlekettiń yntymaqtastyǵyn atap ótti. Bul rette, ol Qazaqstannyń Tuńǵysh Prezıdenti – Elbasy Nursultan Nazarbaevtyń ekijaqty qarym-qatynastyń qalyptasýyna jáne Qazaqstan-Túrikmen strategııalyq seriktestiginiń damýyna qosqan zor úlesine erekshe nazar aýdardy», - delingen SІM habarlamasynda.

Málimetke sáıkes, taraptar saıası-dıplomatııalyq dıalog, saýda-ekonomıkalyq yntymaqtastyq, eki el arasyndaǵy ǵylymı-tehnıkalyq pen mádenı-gýmanıtarlyq ózara árekettestikti damytýdy qosa alǵanda, birqatar ózekti máselelerdi talqylaǵan.

«Kezdesý sońynda G.Berdimuhamedov Elbasy N.Nazarbaev jáne Qazaqstan Prezıdenti Q.Toqaevqa izgi tilegin jetkizip, Elshige Qazaqstan-Túrikmen yntymaqtastyǵyn nyǵaıtý úshin tabysty jáne jemisti eńbek tiledi. Sol kúni qazaqstandyq Elshi senim gramotalarynyń kóshirmelerin tabystaý úshin Túrikmenstannyń Mınıstrler kabıneti tóraǵasynyń orynbasary – Syrtqy ister mınıstri Rashıd Meredovpen kezdesti», - dedi syrtqysaıasat vedomstvosynan.