Qazaqstan elshisi Tájikstan Prezıdentine senim gramotalaryn tabystady

DÝShANBE. QazAqparat - Dýshanbe qalasyndaǵy Ult saraıynda Qazaqstannyń Tájikstandaǵy Elshisi Asqar Tájibaevtyń Tájikstan Respýblıkasynyń Prezıdenti Emomalı Rahmonǵa senim gramotalaryn tabystaý rásimi ótti. Bul jóninde QR Syrtqy ister mınıstrliginiń baspasóz qyzmetine silteme jasap QazAqparat habarlaıdy.

Rásim barysynda Emomalı Rahmon Qazaqstan-Tájikstan qarym-qatynasynyń joǵary deńgeıin atap ótip, eki el arasyndaǵy ózara tıimdi, dástúrli ózara is-qımyldy odan ári damytýǵa daıyn ekenin bildirdi. Sondaı-aq, Tájikstan Prezıdenti Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevqa jáne Prezıdent Qasym-Jomart Toqaevqa izgi tilekterin jetkizip, jańa elshige qazaqstandyq-tájik yntymaqtastyǵyn nyǵaıtý baǵytynda sátti jáne jemisti jumys tiledi.

Óz kezeginde A.Tájibaev Tájikstan Prezıdentin eki el basshylarynyń memleketter arasyndaǵy ejelgi baýyrlastyq pen dostyq qatynastaryn nyǵaıtý jáne keńeıtý jónindegi mindetterin oryndaýda elshilik barlyq kúsh-jigerin jumsaıtynyna sendirdi.