Qazaqstan Elshisi Soltústik Makedonııa Prezıdentine senim gramotalaryn tapsyrdy

SKOPЬE. QazAqparat – Qazaqstan Respýblıkasynyń Soltústik Makedonııadaǵy Elshisi (qyzmetin qosa atqarýshy) Jánibek Ábdrashov Soltústik Makedonııa Respýblıkasynyń Prezıdenti Stevo Pendarovskıge senim gramotalaryn tapsyrdy, dep habarlaıdy QR SІM baspasóz qyzmeti.

Saltanatty rásimnen keıin ótken kezdesýde taraptar saıası, ekonomıkalyq jáne mádenı-gýmanıtarlyq salalardaǵy ekijaqty yntymaqtastyqtyń jaı-kúıi men keleshegin, sondaı-aq koronavırýstyq jaǵdaıdaǵy halyqaralyq problemalardy talqylady. Elshi Memleket basshysy Qasym-Jomart Toqaevtyń áriptesiniń atyna joldaǵan izgi tilekterin jetkizip, Qazaqstandaǵy áleýmettik-ekonomıkalyq ahýal týraly, eldi odan ári reformalaý jáne qazaqstandyq qoǵamdy damytý jónindegi sharalar, sondaı-aq aldaǵy parlamenttik saılaýǵa daıyndyq týraly habardar etti.

Kezdesý sońynda otandyq dıplomat ekijaqty yntymaqtasty odan ári nyǵaıtý úshin barlyq kúsh-jigerin jumsaıtynyna sendirdi. Óz tarapynan Prezıdent S. Pendarovskı Elshini Soltústik Makedonııadaǵy dıplomatııalyq mıssııasynyń bastalýymen quttyqtap, jumysyna tabys tiledi.

Sol kúni J. Ábdirashov Soltústik Makedonııa jınalysynyń (Parlamentiniń) Tóraǵasy Talat Djaferımen kezdesip, eki el arasyndaǵy parlamentaralyq yntymaqtastyq máseleleri boıynsha pikir almasty. Taraptar zań shyǵarý salasynda tájirıbe almasý maqsatynda eki eldiń zań shyǵarýshy organdary arasyndaǵy baılanystardy yntalandyrýǵa ózara múddeli ekendikterin atap ótti.

J. Ábdirashovtyń Soltústik Makedonııa Syrtqy ister mınıstri Býdjar Osmanımen kezdesýinde eki eldiń syrtqy saıası vedomstvolary arasyndaǵy yntymaqtastyqty damytý máseleleri men ózekti halyqaralyq taqyryptar talqylandy. Sonymen qatar, taraptar eki memleket arasyndaǵy dıplomatııalyq qatynastardyń ornaǵanyna 25 jyl tolýymen quttyqtaýlarmen almasty.