Qazaqstan Elshisi Serbııanyń Premer-Mınıstrimen kezdesti
ASTANA. QazAqparat - Belgrad qalasynda Qazaqstannyń Tótenshe jáne Ókiletti Elshisi Nurbah Rústemov Serbııanyń Premer-mınıstri Anna Brnavıchpen kezdesti, dep habarlaıdy QazAqparat.
«Kelissózderde ekijaqty yntymaqtastyqtyń jaǵdaıy men bolashaǵy, onyń ishinde osyǵan deıin bekitilgen ýaǵdastyqtardy júzege asyrý barysy talqylandy. Kezdesý kezinde saýda-ekonomıkalyq yntymaqtastyqty nyǵaıtýǵa, eki el kásipkerleri arasynda baılanystardy tereńdetýge jańa múmkindikterdi qarastyrýǵa erekshe ekpik qoıyldy»,-delingen Majarstandaǵy QR Elshiginiń habarlamasynda.
Elshi N. Rústemovtiń atap ótýinshe, Qazaqstan men Serbııa arasyndaǵy qolaıly qatynastar saýda-ekonomıkalyq salada taraptardyń yntymaqtastyǵyna ońtaıly yqpal etýi tıis. Atap aıtqanda, ekijaqty ózara is-qımyldy ary qaraı keńeıtýde aýyl sharýashylyǵy, ınfraqurylymdyq jobalardyń qurylysy, áskerı-ónerkásiptik, azyq-túlik jáne týrızm salalarynda jaqsy múmkindikter bar.
Sonymen qatar qazaqstandyq dıplomatııalyq mıssııanyń basshysy bıylǵy 7-8 qarashada Serbııa Parlamentiniń tóraıymy Maıa Goıkovıchtiń Qazaqstanǵa alǵashqy resmı sapary elder arasyndaǵy baılanystardy nyǵaıtýǵa tyń serpin beretindigine senim bildirdi. Bul óz kezeginde Qazaqstan men Serbııanyń parlamentaralyq dıalogyn mazmundy túrde tolyqtyrmaq.
Óz kezeginde Anna Brnabıch sońǵy jyldary ekijaqty yntymaqtastyqtyń damýy qarqynyna joǵary baǵa berdi. Osy oraıda ol Qazaqstan Serbııanyń mańyzdy seriktesteriniń biri bolyp tabylatynyn, aldaǵy ýaqytta eki el arasyndaǵy baılanystardyń barlyq baǵyttary boıynsha yntymaqtastyqty tereńdetýge múddeli ekendikterin atap ótti.
Serbııalyq Premer qazaqstandyq bıznesti jergilikti naryqqa belsendi túrde kirýge shaqyrdy jáne birlesken kásiporyndar ashýǵa múmkindikter mol ekenin jetkizdi.
