Qazaqstan elshisi Rım Papasymen kezdesti
ASTANA. QazAqparat - Vatıkanda Qazaqstan Respýblıkasynyń Tótenshe jáne Ókiletti Elshisi Janar Aıtjanova jańa jylǵa arnalǵan Rım Papasy Frantsısktiń qabyldaýyna qatysty, dep habarlaıdy SІM baspasóz qyzmeti.
Sondaı-aq ol Qasıetti taqtyń Memlekettik hatshysy Kardınal Petro Parolın men Qasıetti taqtyń Halyqaralyq qatynastar boıynsha hatshysy Kardınal Pol Rıchard Gallahermen kezdesti.
Іs-shara barysynda Elshi Rım Papasy Frantsıskimen kezdesý ótkizdi. Qazaqstandyq dıplomat Rım Papasyna Vatıkannyń Astanada ótken «EKSPO-2017» halyqaralyq kórmege qatysqany, sonymen qatar, elimizdiń álemde tózimdilik, beıbitshilik pen kelisim bastamalaryn jan-jaqty qoldaýy úshin alǵys bildirdi.
Pontıfık óz Qasıetti Taqtyń janynda akkredıttelgen dıplomatııalyq korpýstyń aldynda sóz sóıleý barysynda adam quqyqtary, jumyssyzdyq, kóshi-qon, bosqyndar, sondaı-aq Sırııa, Ýkraına, Irak, Iemen, Aýǵanstan, Taıaý Shyǵys jáne Afrıkadaǵy qaqtyǵystar týraly atap ótti.
Rım Papasynyń aıtýynsha, halyqtar arasyndaǵy kez-kelgen daýlar qarý-jaraqpen emes, kelissózder arqyly sheshilýi tıis. Osyǵan oraı, Onyń Qasıettiligi búkil álem derjavalaryn Koreıa túbegindegi shıelenisti azaıtýdy jáne ıadrolyq qarýǵa qarsy zańnamalyq tyıym salý týraly dıalogqa qoldaý kórsetýdi talap etti.
Іssapar sheńberinde otandyq Elshisi Petro Parolın men Pol Rıchard Gallahermen kelissózder ótkizdi. Kezdesýler barysynda ekijaqty yntymaqtastyqtyń aǵymdaǵy jaǵdaıy men onyń bolashaǵy, Vatıkannyń Sezge qatysýy, Qazaqstannyń BUU Qaýipsizdik Keńesindegi is-áreketi jáne taǵy da basqa halyqaralyq taqyrybtyń ózekti máseleleri talqylandy.
