Qazaqstan Elshisi Rım Papasy Frantsıskke senim gramotasyn tabys etti

RIM. QazAqparat – Qazaqstan Respýblıkasynyń Shveıtsarııa Konfederatsııasyndaǵy jáne Vatıkan Memleketiniń janyndaǵy qosa atqarýshy Elshisi Qaırat Sarjanov rım-katolık shirkeýiniń basshysy Rım Papasy Frantsıskke senim gramotalaryn tapsyrdy. QazAqparat bul týraly QR Syrtqy ister mınıstrligine silteme jasap habarlaıdy.

«Elshi Qazaqstan Prezıdenti Qasym-Jomart Toqaevtyń jyly lebizderi men izgi tilekterin jetkizip, elimizdiń Qasıetti taqpen yntymaqtastyqty nyǵaıtýǵa daıyn ekendigin bildirdi. Sonymen qatar Elshi Qazaqstan men Vatıkan arasyndaǵy dıplomatııalyq qatynastyń ornaǵanyna 30 jyldyǵy qarsańynda Rım Papasynyń Álemdik jáne dástúrli dinder lıderleriniń VII sezine qatysýynyń tarıhı mańyzdylyǵyn jáne 2023 jylǵy qyrkúıekte Astanada Pontıfıktiń dinı messany ótkizýiniń aýqymdylyǵyn atap ótti», - delingen málimette.

Óz kezeginde Rım Papasy Frantsısk óziniń Qazaqstanǵa saparyn jáne beıbitshilik pen dıalog saıasatyn ilgeriletý jónindegi halyqaralyq bastamany uıymdastyrǵany úshin rızashylyǵyn bildirgen. Pontıfıktiń aıtýynsha, Qasıetti taq óziniń mıssııasyna sáıkes ár adamnyń qol suǵylmaıtyn qadir-qasıetin qorǵaýǵa, ortaq ıgilikke yqpal etýge jáne barlyq halyqtar arasyndaǵy adamı baýyrlastyqty nyǵaıtýǵa tyrysady.

Conymen qatar Vatıkanǵa sapar barysynda Q. Sarjanov Qasıetti taqtyń joǵarǵy basshylyǵy – Vatıkan memlekettik hatshysynyń orynbasary arhıepıskop Edgar Parramen, memlekettermen baılanys jónindegi hatshy arhıepıskop Pol Gallahermen jáne Dinaralyq dıalog boıynsha dıkasterııa prefektisi – musylmandarmen dinı baılanystar jónindegi komıssııanyń prefektisi kardınal Mıgel Anıso Gıksotpen jeke kezdesýlerdi ótkizgen.

Olardyń barysynda ekijaqty ózara is-qımyldyń ózekti máseleleri, onyń ishinde medıtsına, ǵylym jáne zertteýler salasy, sondaı-aq adam quqyqtary, ıadrolyq qarýsyzdaný jáne klımattyń ózgerýi máseleleri talqylandy.