Qazaqstan Elshisi Reseı Prezıdentine senim gramotalaryn tapsyrdy

NUR-SULTAN. QazAqparat – Qazaqstan Respýblıkasynyń Reseı Federatsııasyndaǵy Elshisi Ermek Kósherbaev Reseı Federatsııasynyń Prezıdenti Vladımır Pýtınge senim gramotalaryn tapsyrdy, dep habarlaıdy QazAqparat QR Syrtqy ister mınıstrligine silteme jasap.

Óz kezeginde, Vladımır Pýtın Reseı men Qazaqstan arasyndaǵy qatynastardy senimdi strategııalyq seriktestik jáne odaqtasýdyń úlgisi dep atady.

«Ekijaqty qarym-qatynas kórshiles halyqtarymyzdyń arasyndaǵy berik tarıhı, mádenı jáne rýhanı baılanystarǵa negizdelgen. Biz Qazaqstan basshylyǵymen ózara senimimizdi joǵary baǵalaımyz. Ótken jyly Prezıdent Qasym-Jomart Kemeluly Toqaevpen toǵyz ret kezdesý ótkizdik jáne de jaqyn dosymyz Nursultan Ábishuly Nazarbaevpen de tyǵyz baılanystamyz», - dep atap ótti Reseı prezıdenti.

V. Pýtın Reseı men Qazaqstannyń birlesken kúsh-jigeriniń arqasynda EAEO aıasyndaǵy yqpaldastyq turaqty damyp kele jatqanyn jetkizdi. Onyń aıtýynsha, eki el arasyndaǵy saýda-ekonomıkalyq qatynastar barlyq baǵyttarda, sonyń ishinde ónerkásip, energetıka jáne ınvestıtsııa salalarynda damyp keledi.

«Reseı men Qazaqstan halyqaralyq kún tártibindegi máselelerge qatysty kózqarastaryn birlesip úılestirýde. Qazaqstandyq seriktesterimiz, bilesizder, Sırııadaǵy ahýal boıynsha úrdisterdi ońtaılandyrý úshin Astana kelissózderin uıymdastyrýǵa múmkindik berdi», - dedi V. Pýtın.

Sonymen birge, Kreml saraıynyń Aleksandr zalynda ótken saltanatty rásimde barlyǵy 23 shet eldiń elshileri óz senim gramotalaryn tapsyrdy. Onyń ishinde AQSh, Germanııa, Ulybrıtanııa, Frantsııa, Qytaı, Iran, Avstralııa, Shvetsııa jáne t.b. bar.