Qazaqstan Elshisi Ózbekstannyń Úkimet basshysymen kezdesti
NUR-SULTAN. QazAqparat - Qazaqstannyń Ózbekstandaǵy Elshisi Darhan Satybaldy eldiń Premer-Mınıstri Abdýlla Arıpovpen kezdesti, dep habarlaıdy QazAqparat SІM silteme jasap.
Ózbekstan Úkimet basshysy eki el arasyndaǵy qarym-qatynastardy ilgeriletýdiń deńgeıi men qarqynyna qanaǵattanatynyn bildirdi.
A.Arıpov Qazaqstannyń Tuńǵysh Prezıdenti - Elbasy Nursultan Nazarbaevtyń eldiń qazirgi zamanǵy jetistikterine qosqan erekshe úlesin atap ótip, Táýelsizdik jyldarynda Qazaqstannyń damýyna joǵary baǵa berdi. Qazaqstandaǵy prezıdenttik saılaýdyń qorytyndylarymen quttyqtap, saılaý protsesiniń sapaly uıymdastyrylýy men ashyqtyǵyn atap ótti.
Óz kezeginde Qazaqstan Elshisi quttyqtaý úshin alǵysyn bildirip, QR Prezıdenti saılaýynyń qorytyndysy Ózbekstanmen jan-jaqty qarym-qatynastardy odan ári damytýǵa baǵyttalǵan eldiń syrtqy saıası baǵytynyń sabaqtastyǵyn atap ótti. Ózbekstanda júzege asyrylyp jatqan aýqymdy reformalar eki baýyrlas elder arasyndaǵy jan-jaqty baılanystardy keńeıtýge yqpal etetinin málimdedi.
D.Satybaldy Qazaqstan-Ózbekstan qarym-qatynastarynyń aǵymdaǵy jaǵdaıy men aldaǵy josparlary týraly qysqasha baıandap berdi. Aǵymdaǵy jyldyń birinshi jartyjyldyǵyndaǵy saıası ekijaqty yntymaqtastyqtyń aýqymdy qorytyndylaryn aıta kele, aǵymdaǵy jyldyń 14-15 sáýirinde Qazaqstan Prezıdenti Qasym-Jomart Toqaevtyń Tashkentke jasaǵan memlekettik saparynyń jáne ú.j. 5-7 maýsymda QR Parlamenti Májilisiniń Tóraǵasy Nurlan Nyǵmatýlınniń resmı saparynyń qorytyndylary mańyzdy mánge ıe boldy. Sondaı-aq, osyndaı joǵary deńgeıdegi saparlar Qazaqstan-Ózbekstan qarym-qatynastarynyń irgetasyn odan ári nyǵaıtýǵa jáne keńeıtýge múmkindik beretinin atap ótti.
Saýda yntymaqtastyǵy máselelerin talqylaý aıasynda qazaqstandyq dıplomat 2019 jyldyń І-shi toqsanynyń qorytyndysy boıynsha ózara saýda kórsetkishiniń 29,3%-ǵa artqanyn atap ótti. Sondaı-aq Qazaqstan Elshisi odan ári ósý úshin rezervterdiń bar ekenin atap ótip, ekijaqty saýda aınalymyn arttyrý boıynsha birlesken algorıtm jasaýdy, sondaı-aq Qazaqstan men Ózbekstan arasyndaǵy ekijaqty yntymaqtastyq jónindegi birlesken úkimetaralyq komıssııa otyrysynyń áleýetin barynsha paıdalanýdy usyndy.
Kezdesý qorytyndysy boıynsha taraptar yntymaqtastyqty jandandyrý jáne ózara is-qımyldyń jańa taýashalaryn aıqyndaý jónindegi jumysty jalǵastyrýǵa ýaǵdalasyp, úkimetaralyq komıssııanyń teń tóraǵalarynyń mártebesin kóterý Qazaqstan-Ózbekstan yntymaqtastyǵynyń keń aýqymdy máselelerin jedel sheshýge múmkindik beretinine senim bildirdi.
