Qazaqstan elshisi Nurbaq Rústemov Serbııa prezıdentimen kezdesti
ASTANA. QazAqparat - 8 tamyz kúni Qazaqsannyń Serbııadaǵy Tótenshe jáne ókiletti elshisi Nurbaq Rústemov Serbııa prezıdenti Aleksandr Výchıch jáne Serbııa Premer-mınıstriniń birinshi orynbasary Ivıts Dachıchpen kezdesti, dep habarlaıdy «QazAqparat» HAA tilshisi.
Taraptar kezdesý barysynda Qazaqstannyń jáne Serbııanyń áleýmettik-ekonomıkalyq qalyptasýy men qazaqstandyq-serbııalyq qarym-qatynastardyń keleshegi men qazirgi jaıyn talqylady. Sonymen birge, Serbııa tóńiregi men Balqan aımaǵyndaǵy syrtqy saıası jaǵdaılar men halyqaralyq máselelerdi sóz etti.
Qazaqstandyq dıplomat Serbııa basshylyǵyna Qazaqtan men Serbııa arasyndaǵy saýda-ekonomıkalyq baılanystyń naqty qadamdary boıynsha nyǵaıyp kele jatqanyn tilge tıek etip, bıylǵy qos eldiń delegatsııalarynyń bir-birine jasaıtyn saparlary týraly aıtty. Kezdesýde «EKSPO-2017» kórmesine qatysqany úshin Qazaqstan Prezıdenti Nursultan Nazarbaevtyń Serbııa Prezıdentine joldaǵan Alǵys haty tabys etildi.
Óz kezeginde Aleksandr Výchıch bıyl maýsym aıynda Astanaǵa sapary barysynda kórsetilgen qonaqjaılyqqa alǵysyn bildirdi. Sonymen birge, halyqaralyq kórmeniń joǵary deńgeıde uıymdastyrylǵan jetkizdi. Ol óz sózinde serb taraby saýda-ekonomıkalyq baǵytta ózderiniń áleýetterin qoldanýǵa ázir ekenin aıtyp, qazaqstandyq kásipkerlerdi belsendi túrde Serbııa naryǵyna enýge shaqyrdy.
Novı-sade qalasynda Qazaqstan elshisi Voevodına Avtonomııalyq aımaǵy Úkimetiniń Tóraǵasy Igor Mırovıchpen kezdesip, qos tarap eki el arasyndaǵy saýda-sattyq máselesin talqylady.
Tóraǵanyń qolyna Qazaqstan Prezıdentiniń «Qoǵamdyq sanany jańǵyrtý» maqalasynyń serb tiline aýdarylǵan nusqasy tapsyryldy. Aımaq basshysy ǵylymı-óndiristik ınstıtýttar men jetekshi serb kompanııalarmen seriktestik ornatý úshin Almaty oblysy delegatsııasynyń jaqyn arada Serbııaǵa keletininen habardar boldy.
