Qazaqstan elshisi Lıtva Prezıdentine senim gramotasyn tapsyrdy
ASTANA. QazAqparat - Qazaqstannyń Lıtva Respýblıkasyndaǵy Elshisi Vıktor Temırbaev Lıtva Prezıdenti Dale Grıbaýskaıtege senim gramotasyn tapsyrdy, dep habarlaıdy QR Syrtqy ister mınıstrliginiń baspasóz qyzmeti.
Lıtva memleketiniń qaıta qurylýynyń 100-jyldyq mereıtoıyna oraı Prezıdent N.Nazarbaevtyń quttyqtaýyn jetkize otyryp, V.Temirbaev Qazaqstan men Lıtva arasyndaǵy senimdi áriptestikti jalǵastyratyn jáne kóptaraýly qazaqstandyq-lıtvalyq yntymaqtastyqty odan ári damytatyn Astananyń aınymas baǵytyn atap ótti.
Lıtva Prezıdenti óz kezeginde, 2011 jyly Qazaqstanǵa jasaǵan saparyn jyly lebizben eske túsirip, 2018 jyly jazda lıtvalyq jastardyń Qaraǵandy oblysyna ekspedıtsııasyn ótkizýine oraı qazaqstandyqtarǵa alǵysyn bildirdi.
Kezdesý barysynda taraptar, ekijaqty qatynastar men halyqaralyq problematıkanyń ózekti máselelerin talqyǵa salyp, tranzıttik-kóliktik áleýetti odan ári damytý, «jańa ekonomıka», aýyl sharýashylyǵy, bilim berý men medıtsına salalaryndaǵy keń aýqymdy perspektıvalarǵa jiti kóńil bóldi.
Lıtva basshysy D. Grıbaýskaıte Prezıdent N. Nazarbaevtyń Qazaqstannyń serpindi áleýmettik-ekonomıkalyq túrlenýindegi jáne jahandyq qaýipsizdik qurylymyn nyǵaıtýdaǵy rólin joǵary baǵalady.
D. Grıbaýskaıte lıtva tarapynyń eki memleket úshin basym salalarda Qazaqstanmen yntymaqtastyqty odan ári arttyra túsýge daıyn ekenin quptap ótti.
