Qazaqstan Elshisi QHR Tóraǵasyna senim gramotalaryn tapsyrdy

NUR-SULTAN. QazAqparat - Beıjińde Qazaqstan Respýblıkasynyń Qytaı Halyq Respýblıkasyndaǵy Elshisi Ǵabıt Qoıshybaev Qytaı Halyq Respýblıkasynyń Tóraǵasy Sı Tszınpınge senim gramotalaryn tapsyrdy, dep habarlaıdy QR SІM baspasóz qyzmeti.

Saltanatty rásim aıaqtalǵannan keıin ótken qysqasha kezdesý barysynda, QHR Tóraǵasy QR Tuńǵysh Prezıdenti - Elbasy Nursultan Nazarbaevqa jáne Qazaqstan Prezıdenti Qasym-Jomart Toqaevqa jyly sálem men izgi tilekterin jetkizdi. Qytaı basshysy, sondaı-aq, eki el arasyndaǵy máńgilik jan-jaqty strategııalyq áriptestikti odan ári tereńdetý maqsatynda Qazaqstanmen tyǵyz saıası dıalogty qoldaýǵa daıyn ekenin málimdedi.

Óz kezeginde, Ǵ. Qoıshybaev qazaqstandyq taraptyń Qytaımen ózara tıimdi yntymaqtastyqty damytýǵa jáne tereńdetýge daıyndyǵyn rastaı otyryp, jańa laýazymda ekijaqty strategııalyq áriptestikti jańa sapaly deńgeıge kóterý úshin barlyq kúsh-jigerin salatynyna sendirdi.