Qazaqstan Elshisi Qatar Ámirine senim gramotalaryn tapsyrdy
«Gramotalardy tapsyrý rásiminen keıin bolǵan suhbat barysynda qazaqstandyq dıplomat Ámirge QR Prezıdenti Qasym-Jomart Toqaevtyń ystyq sálemi men izgi tilekterin jetkizdi. Elshi Qatar Memleketi Qazaqstan úshin mańyzdy jáne senimdi seriktes ekenin aıta kele, eki el arasyndaǵy qarym-qatynastardy odan ári nyǵaıtýǵa bar kúsh-jigerin salatynyna sendirdi», - delingen QR Syrtqy ister mınıstrliginiń aqparatynda.
Sondaı-aq A.Isaǵalıev Qazaqstannyń, ekonomıkalyq jáne áleýmettik salalarda qol jetkizgen sońǵy jetistikteri týraly baıandap, Qazaqstan Prezıdentiniń «Jańa jaǵdaıdaǵy Qazaqstan: Іs-qımyl kezeńi» atty halyqqa joldaýynyń negizgi tarmaqtarymen tanystyrdy.
Óz kezeginde, Ámir Qazaqstan Elshisin Qatardaǵy dıplomatııalyq mıssııasynyń bastalýymen quttyqtap, Qazaqstan-Qatar yntymaqtastyǵyn odan ári keńeıtý jolyndaǵy jumysyna sáttilik tiledi. Sheıh Támım ben Hamad Ál-Tánı Ortalyq Azııadaǵy óziniń basty seriktesi dep sanaıtyn Qazaqstanmen baılanysty jan-jaqty damytýǵa úlken mán beretinin atap ótti. Ámir 2014 jyly elimizge jasaǵan resmı saparyn esine alyp, bul onyń osy óńirge alǵashqy kelýi bolǵanyn atap ótti. Ol bizdiń elimiz týraly jyly lebizin bildirip, onyń mańyzdy saıası salmaǵy men eleýli ekonomıkalyq áleýetin basa kórsetti.
Qatar Ámiri 2019 jylǵy maýsymda Dýshanbede AÓSShK V sammıti aıasynda QR Prezıdenti Q.Toqaevpen kezdesý barysynda qol jetkizilgen ýaǵdalastyqtarǵa sáıkes, bıylǵy naýryzda Qazaqstanǵa memlekettik sapary josparlanǵanyn aıtty. Alaıda, sapar merzimi álemdegi koronavırýs indetine baılanysty keıinge shegerildi. Sheıh Támım jaqyn bolashaqta Nur-Sultanǵa saparmen baryp, Prezıdent Q.Toqaevpen ekijaqty yntymaqtastyqtyń barlyq máselelerin, eń aldymen saýda-ekonomıkalyq jáne ınvestıtsııalyq salalardy talqylaıtynyn ýáde etti.
