Qazaqstan Elshisi Izraıl Prezıdentine senim gramotalaryn tapsyrdy

NUR-SULTAN. QazAqparat - Qazaqstan Respýblıkasynyń Elshisi Satybaldy Burshaqov Izraıl Memleketiniń Prezıdenti Reýven Rıvlınge «Beit Hanassi» rezıdentsııasynda senim gramotalaryn tapsyrdy, dep habarlaıdy QR SІM baspasóz qyzmeti.

Saltanatty rásim barasynda Izraıl Prezıdenti men Qazaqstan Elshisi ekijaqty qarym-qatynastar men olardyń damý perspektıvalaryn, sondaı-aq halyqaralyq formattar aıasyndaǵy ózara is-qımyldardy talqylady.

Ekinshi dúnıejúzilik soǵys kezinde evreılerge baspana bergeni úshin alǵys bildire otyryp, R.Rıvlın qazaq halqyna degen alǵys sezimi ızraıldyqtardyń júreginde máńgi saqtalady dep sendirdi.

Izraıl Memleketiniń basshysy kópultty Qazaqstandaǵy toleranttylyq pen konfessııaaralyq kelisim saıasaty joǵary qurmetke laıyq jáne is júzinde ksenofobııaǵa, antısemıtızmge jáne basqa da tózimsizdik kórinisterine qarsy turý qajettiliginiń aıqyn úlgisi bolyp tabylatynyn atap ótti.

Densaýlyq saqtaý, ındýstrııa, joǵary tehnologııalar jáne noý-haý salasyndaǵy syndarly jáne ózara tıimdi ekijaqty yntymaqtastyq deńgeıin joǵary baǵalaı otyryp, Izraıl Prezıdenti Qazaq elshisine birlesken josparlar men jobalardy iske asyrýda tabys tiledi.

Qazaqstan halqy men Prezıdentine Táýelsizdik kúnine oraı quttyqtaý joldaǵany úshin Izraıl Memleketiniń basshysyna alǵysyn bildire otyryp, S.Burshaqov dostyq baılanystardy odan ári nyǵaıtý, atap aıtqanda eki el arasyndaǵy saýda jáne ekonomıkalyq kooperatsııaǵa qarqyn berý úshin barlyq kúsh-jigerin jumsaıtynyna kámil sendirdi.

Sóz sońynda R.Rıvlın Prezıdent Qasym-Jomart Toqaevqa eń izgi tilekterin joldap, Izraılge resmı saparmen kelýge shaqyrdy.