Qazaqstan Elshisi Germanııanyń Federaldy prezıdentine senim gramotasyn tapsyrdy
BERLIN. QazAzparat - Astanalyq «Belvıý» saraıynda Qazaqstannyń Elshisi Dáýren Káripov Germanııa Federatıvtik Respýblıkasynyń Federaldy prezıdenti Frank-Valter Shtaınmaıerge saltanatty túrde senim gramotalaryn tabystady, dep habarlaıdy QR Syrtqy ister mınıstrliginiń baspasóz qyzmeti.
Saltanatty rásimnen keıin bolǵan suhbat barysynda Elshi D.Káripov F.-V.Shtaınmaıerge Qazaqstannyń Prezıdenti Qasym-Jomart Toqaevtyń sálemin joldady, sondaı-aq Qazaqstan-Germanııa saıası, ekonomıkalyq jáne mádenı-gýmanıtarlyq qarym-qatynasy strategııalyq seriktestiginiń joǵary deńgeıde ekenin atap ótti.
Qazaqstandyq dıplomat Germanııa Prezıdentine Qazaqstandaǵy ekonomıkany jańǵyrtý, áleýmettik salany damytý jáne demokratııalandyrý jónindegi QR Tuńǵysh Prezıdenti – Elbasy Nursultan Nazarbaevtyń jáne memleket Basshysynyń bastamasymen júzege asyrylyp jatqan sharalardan habardar etti.
D.Káripov ekijaqty baılanystardyń barlyq kesheni boıynsha memleketaralyq qarym-qatynasty nyǵaıtý jáne ózara múddelerge jaýapty mindetterdi júzege asyrýǵa qatysty kúsh-jigerdi arttyrý jónindegi eki el arasyndaǵy yntymaqtastyq tetikterin jetildirýdiń mańyzdylyǵyn atap ótti.
Nemis Prezıdenti Qazaqstannyń turaqty damýyna joǵary baǵa berip, Prezıdent Qasym-Jomart Toqaevtyń eldegi jańa saıası bastamalaryna tabys tiledi.
Bul turǵyda Germanııanyń Federaldy Prezıdenti 2017 jyly Nur-Sultan qalasyna jasaǵan sapary aıasynda ótken Qazaqstan-German iskerlik keńesi barysynda eki eldiń bıznes qurylymdary arasynda 20-ǵa jýyq kelisimge qol qoıylǵanyn eske aldy.
Ol QR Prezıdenti Qasym-Jomart Toqaevtyń Germanııaǵa jasaıtyn alǵashqy eýropalyq saparyn bıyl ótkizý perspektıvasyn qoldaı otyryp, eki el úshin memlekettik basym salalarda Qazaqstanmen jan-jaqty yntymaqtastyqty damytýǵa degen nemis tarapynyń shynaıy peıilin bildirdi.
Kezdesý sońynda F.-V.Shtaınmaıer Qazaqstan basshylyǵyna dostyq sálem joldap, Elshi D.Káripovke dıplomatııalyq mıssııasyn oryndaýda tabys tiledi.
