Qazaqstan elshisi Ázerbaıjannyń Syrtqy ister mınıstrimen kezdesti
Kezdesý barysynda Álim Baıel ázerbaıjandyq syrtqy saıası vedomstvosynyń basshysyna senim gramotalarynyń kóshirmelerin tabys etti.
Al mınıstr Jeıhýn Baıramov Elshini jańa qyzmetke taǵaıyndalýymen quttyqtap, oǵan tolaıym tabys tiledi.
Óz kezeginde elshi Qazaqstan halqy men Prezıdentiniń senimin aqtaýǵa bar kúsh-jigerin salatynyn bildirdi, sondaı-aq, mınıstr Baıramovqa QR Syrtqy ister mınıstri Murat Nurtileýdiń izgi tilekterin jetkizdi.
Kezdesý barysynda saıası, saýda-ekonomıkalyq, kólik-logıstıka, energetıka, mádenı-gýmanıtarlyq jáne basqa da salalardaǵy ekijaqty yntymaqtastyq máseleleri talqylandy.
Álim Baıel Memleket basshylary aıqyndaǵan baǵdardyń nátıjesinde búginde Qazaqstan-Ázerbaıjan yntymaqtastyǵynyń barlyq salalarynda strategııalyq áriptestikti tereńdetý men damytýǵa múmkindik beretin ózara túsinistik pen senimniń joǵary deńgeıi qalyptasqanyn atap ótti. Qazaqstandyq dıplomat qoıylǵan maqsattarǵa qol jetkizý úshin bar kúsh-jigerin salatynyn aıtty.
Óz kezeginde Ázerbaıjan mınıstri jańa taǵaıyndalǵan elshi Álim Baıeldiń ázerbaıjan tilin tamasha meńgergenin aıtyp, bul jaıttyń Elshiniń jumysynda aıtarlyqtaı artyqshylyq bolatynyna senim bildirdi. Ázerbaıjan SІM-niń basshysy Qazaqstan men Ázerbaıjan arasyndaǵy keń aýqymdy ekijaqty jáne kópjaqty qarym-qatynastardyń dınamıkasyn qanaǵattanarlyqpen ataı otyryp, eki baýyrlas halyqtyń tarıhı ári mádenı tamyrlary ortaq ekenine toqtaldy.
Taraptar ózara is-qımyldyń halyqaralyq uıymdar aıasyndaǵy mańyzdy baǵyttary boıynsha birlese kúsh-jiger jumsaýdy jalǵastyra berý qajettigine nazar aýdardy. Osy rette Qazaqstan men Ázerbaıjannyń bastamasymen qurylǵan Túrki memleketteri uıymynyń álemdik arenadaǵy bedeliniń artyp kele jatqany erekshe atalyp ótti.
Búginde qazaq-ázerbaıjan ekijaqty yntymaqtastyǵynyń negizgi jobalary arasynda Transkaspıı kólik baǵytyn odan ári damytý, qazaqstandyq energetıkalyq resýrstardyń eksportyn ártaraptandyrý, Kaspıı teńiziniń túbi arqyly optıkalyq-talshyqty baılanys jelisin tartý jáne t.b. bar.
Aldaǵy kezeńniń negizgi maqsattarynyń biri retinde ózara saýda kólemin 1 mlrd dollarǵa jetkizý máselesi belgilenip otyr.
Serikbol Qoshmaǵambetov
