Qazaqstan Elshisi Ázerbaıjan Prezıdentine senim gramotasyn tapsyrdy

BAKÝ. QazAqparat — Búgin Qazaqstannyń Elshisi Serjan Ábdikárimov Ázerbaıjan Prezıdenti Ilham Álıevke senim gramotasyn tapsyrdy, dep habarlaıdy «QazAqparat» HAA tilshisi.

Suhbat barysynda Ázerbaıjan Prezıdenti Qazaqstannyń Tuńǵysh Prezıdenti – Elbasy Nursultan Nazarbaevpen tyǵyz baılanys ornatylǵanyn, onyń Prezıdent Qasym-Jomart Toqaev tusynda qarqyndy damyp kele jatqanyn ári ekijaqty yntymaqtastyqty strategııalyq áriptestiktiń jańa deńgeıine shyǵarýǵa múmkindik berip otyrǵanyn tilge tıek etti.

I.Álıev ınvestıtsııa, saýda-ekonomıka, otyn-energetıka, tranzıt-kólik, aýyl sharýashylyǵy, mádenı-gýmanıtarlyq jáne basqa salalardaǵy ekijaqty jáne kópjaqty ózara yqpaldastyqty odan ári nyǵaıtý jaıly pikirlerin aıtty.

Óz kezeginde QR Elshisi Ázerbaıjan basshysyna qabyldaǵany úshin alǵys aıtyp, baýyrlas eki memleket pen halyqtyń arasyndaǵy qarym-qatynastardy nyǵaıtýǵa bar múmkindigin jumsaýǵa ázir ekenin bildirdi.

Sondaı-aq, I.Álıev S. Ábdikárimovti elshi laýazymyna taǵaıyndalýymen quttyqtap, aldaǵy jumysyna tabys tiledi.

Avtory: Bekbaý Taımanov