Qazaqstan Elshisi Aýstrııanyń Federaldyq Prezıdentine senim gramotalaryn tapsyrdy

NUR-SULTAN. QazAqparat – Hofbýrg saraıynda Qazaqstan Elshisi Qaırat Omarov Aýstrııanyń Federaldyq Prezıdenti Aleksandr Van der Bellenge senim gramotalaryn tapsyrdy, dep habarlaıdy QazAqparat QR SІM baspasóz qyzmetine silteme jasap.

Saltanatty rásimnen keıin ótken kezdesý barysynda otandyq dıplomat Prezıdent Qasym-Jomart Toqaevtyń aýstrııalyq áriptesine joldaǵan jyly lebizderi men izgi tilekterin jetkizip, Qazaqstannyń atalǵan elmen ekijaqty yntymaqtastyqty odan ári nyǵaıtýǵa úlken mán beretinin habarlady.

Elshi suhbattasýshysyn Memleket basshysynyń elimizdiń odan ári demokratııalandyrýǵa baǵyttalǵan jańa reformalarymen, Qazaqstannyń Tuńǵysh Prezıdenti – Elbasy Nursultan Nazarbaevtyń ıadrolyq qarýsyzdaný men ony taratpaýdy alǵa jyljytatyn jańa bedeldi jahandyq alań retinde Kóshbasshylardyń ıadrolyq qarýsyz álem úshin jahandyq alıansyn qurý týraly bastamasymen tanystyrdy.

Óz kezeginde, A. Van der Bellen Qazaqstan Prezıdentine jyly tilekterin joldap, Aýstrııa Qazaqstandy mańyzdy ári senimdi seriktesi retinde qarastyryp, Venanyń tyǵyz jáne jan-jaqty yntymaqtastyqty damytýǵa múddeliligin atap ótti.

Kezdesý sońynda Aýstrııa Prezıdenti Elshini qyzmetiniń resmı bastalýymen quttyqtap, ekijaqty qatynastardy odan ári nyǵaıtý isine tabys tiledi.