Qazaqstan Elshiligi taǵy 34 azamatty Kıevten Polshaǵa alyp shyqty

NUR-SULTAN. QazAqparat – Qazaqstannyń Ýkraına astanasyndaǵy Elshiligi 34 azamatty Polsha shekarasyna alyp shyqty. Olar sol elden Qazaqstanǵa arnaıy reıspen qaıtady. Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.

Eske salsaq, búgin tańerteń Ýkraınadaǵy Qazaqstan azamattaryn ákelýge 179 oryndyq ushaq Polshaǵa attanǵan bolatyn.

QR SІM baspasóz qyzmetiniń basshysy Erlan Jetibaevtyń habarlaýynsha, túske deıin Ýkraına-Polsha shekarasynan 241 adam ótken.

Olardyń alǵashqy legi búgin túnde Almatyǵa jetkiziledi.

Qazaqstan azamattarynyń keıbiri Ýkraınanyń aýmaǵynan Polsha shekarasyna deıin qalaı jetkenderin aıtty.

Jalpy búgin Ýkraınadaǵy qazaqstandyqtardy Polsha arqyly elge aldyrý úshin 3 reıs uıymdastyrylady.

Olar:

1) 28 aqpan Polsha ýaqytymen: Atyraý (08:45) – Katovıtse (09:00/10:30) – Atyraý (19:20); Al Nur-Sultan ýaqytymen: Atyraý (09:45) – Katovıtse (14:00/15:30) – Atyraý (20:20).

2) 28 aqpan Polsha ýaqytymen: Atyraý (14:00) – Katovıtse (14:20/16:00) – Atyraý (00:20+1), jergilikti ýaqyt. Al Nur-Sultan ýaqytymen: Atyraý (15:00) – Katovıtse (19:00/20:30) – Atyraý (21:20), ýaqyty Nur-Sultan qalasy.

Úshinshi reıstiń kestesin Azamattyq avıatsııa komıteti qosymsha habarlaýǵa tıis.

Memleket basshysynyń baspasóz hatshysy Berik Ýálı Qasym-Jomart Toqaev Qazaqstan azamattaryn Ýkraınadan evakýatsııalaýǵa qatysty jaǵdaıdy jiti qadaǵalap otyrǵanyn jazdy.

Ýkraınadaǵy qazaqstandyqtar mingen alǵashqy reıs Polshadan tús qaıta ushyp shyqty.