Qazaqstan Elshiligi Ózbekstanda qamaýǵa alynǵan qazaqstandyq azamatqa kómektesýde
ASTANA. 7 sáýir. QazAqparat - Qazaqstan Elshiligi Ózbekstanda qamaýǵa alynǵan QR azamaty Ermek Qosmaǵambetovke qatysty jaǵdaı boıynsha kómekter kórsetýde.
Birer kún buryn qazaqstandyq buqaralyq aqparat quraldarynda qazaq-ózbek shekarasyndaǵy «Jibek joly» shekara beketinde Qazaqstan Respýblıkasynyń azamaty Ermek Qosmaǵambetovtyń tutqyndalýy faktisi týraly aqparat jarııalandy.
Qazaqstannyń Ózbekstandaǵy Elshiliginen málim etkendeı, ústimizdegi jyldyń 17 naýryzy kúni joǵaryda atalǵan bekette shekarany ótý kezinde Ózbekstannyń kedenshileri E.Qosmaǵambetov pen Aqmaral Shákirova tutqyndady, A.Shákirova keıin abaqtydan bosatyldy. Qazaqstan azamatynyń netbýgynda dinı-ekstremıstik sıpattaǵy faıldardyń tabylýy ony tutqyndaýǵa sebep bolǵan.
Ádebıettanýshylyq saraptamanyń qorytyndysyna sáıkes, netbýkte tabylǵan «Zov k ıslamskoı ýmme. Kak dolgo eşe?» atty derekti fılminde dinı fýndamentalızm ıdeıalary bar. Atalmysh fılmdi Ózbestan Respýblıkasynyń aýmaǵynda daıyndaýǵa jáne taratýǵa tyıym salynǵan.
Qazirgi ýaqytta E.Qosmaǵambetov, Tashkent oblysy Qıbraı aýdandyq soty aǵymdaǵy jyldyń 30 naýryzynda shyǵarǵan úkimine sáıkes Ózbekstan Respýblıkasy Ulttyq qaýipsizdik qyzmetiniń tergeý abaqtysynda qamaýda otyr. QR azamatyna 246-baptyń 1-tarmaǵy boıynsha (dinı ekstremızmdi, separatızm men fýndamentalızmdi nasıhattaý) qarastyrylǵan qylmysty jasady degen aıyp taǵylyp otyr.
Elshilikten naqtylaǵandaı, E.Qosmaǵambetovtyń týystaryna qorǵaýshyny tabý kómegi kórsetildi, sondaı-aq ony ustaý sebepteri egjeıli-tegjeıli túsindirildi. Qazirgi ýaqytta dıplomatııalyq ókildik qorǵaýshymen birge ustalǵan QR azamatynyń ákesine jan-jaqty kómekter kórsetýde.
Kelesi aptada qorǵaýshynyń E.Qosmaǵambetovpen kezdesýi josparlanǵan.
