Qazaqstan elshiligi BAÁ-de shaǵyn fýtboldan ótken dıplomatııalyq týrnırde jeńiske jetti
ASTANA. 9 jeltoqsan. QazAqparat - Birikke Arab Ámirligi astanasy Ábý-Dabıde tirkelgen dıplomatııalyq ókilder komandalary arasynda shaǵyn fýtboldan halyqaralyq týrnır ótti.
BAÁ-degi Qazaqstan elshiligi QR Táýelsizdigi kúnine oraı uıymdastyrǵan sporttyq sharaǵa Gremanııa, Reseı, Ýkraına, Túrkııa, Ózbekstan jáne Ońtústik Afrıka Respýblıkasynyń komandalary qatysty.
Sheteldik dıplomattar aldynda sóz sóılegen elimizdiń BAÁ-degi Tótenshe jáne Ókiletti Elshisi Asqar Mýsınov Qazaqstannyń halyqaralyq arenadaǵy sporttyq jetistikterine erekshe toqtalyp ótti.
«Aǵymdaǵy jyly Londonda ótken Olımpıada oıyndary Táýelsiz Qazaqstannyń besinshi oıyndary bolatyn ári qazaqstandyq sportshylar tamasha nátıje kórsetti. Bizdiń elimiz jeti altyn, bir kúmis jáne bes qola medal jeńip aldy. Osylaısha, tańqalarlyq serpilis jasap, medal sany boıynsha 2008 jylǵy Beıjiń Olımpıadasy qorytyndysyndaǵy 29 orynnan London Olımpıada oıyndarynda 12 orynǵa kóterildi. Bul jetistik QR Prezıdenti Nursultan Nazarbaevtyń basshylyǵymen qazaqstandyq sporttyń qarqyndy damyp kele jatqandyǵynyń aıǵaǵy», dedi A.Mýsın.
Tartysty ótken týrnır barysynda Qazaqstan elshiliginiń quramasy jeńiske jetti. Jartylaı fınalda qazaqstandyq dıplomattar Ózbekstan quramasynan, al aqtyq synda Túrkııa komandasynan basym tústi.
Jarys qorytyndysynda A.Mýsın jeńimpazdarǵa estelik syılyqtar men týrnır kýbogyn tabys etti.
