Qazaqstan Elshiligi ál-Kýveıtte VII Azııa oıyndarynyń alaýyn tutandyrý rásimi qurmetine oraı saltanatty qabyldaý uıymdastyrdy
ANA. 11 qańtar. QazAqparat - Ústimizdegi jyldyń 10 qańtarynda ál-Kýveıt qalasynda Qazaqstan Respýblıkasynyń Saýd Arabııasy men Kýveıt Memleketindegi Elshisi Q.Lama Sharıf VII Azııa oıyndarynyń alaýyn tutandyrý rásimi qurmetine oraı saltanatty qabyldaý uıymdastyrdy, dep habarlady Qazaqstannyń Caýd Arabııasyndaǵy Elshiliginiń baspasóz qyzmeti.
Saltanatty sharaǵa QR Týrızm jáne sport mınıstri T.Dosmuhambetov bastaǵan qazaqstandyq mártebeli delegatsııa músheleri, Azııalyq Olımpıada Keńesiniń basshylyǵy men Kýveıtte ornalasqan sheteldik dıplomatııalyq korpýs qatysty.
Mınıstr T.Dosmuhambetov kelgen qonaqtardyń aldynda sóılegen sózinde Qazaqstan úshin Qysqy oıyndardyń ótkizilýi mańyzdy tarıhı shara bolyp esepteletinin jáne táýelsiz memleket tarıhynda óshpes iz qaldyratynyn erekshe atap ótti. «Bizdiń respýblıkamyz úshin Azııalyq qoǵamdastyqtyń qurlyqtyq jarystaryn ótkizý quqyǵyna ıe bolý Olımpıada tarıhyndaǵy qazaqstandyq joldyń bastamasy bolyp sanalady», - dedi ol. Mınıstr shtab-páteri ál-Kýveıt qalasynda ornalasqan Azııalyq Olımpıada Keńesine eki el arasyndaǵy sport salasyndaǵy yntymaqtastyqty nyǵaıtýǵa qosqan úlesi men Qazaqstannyń Qysqy Azııa oıyndaryn ótkizýge daıyndyǵyna kórsetken qoldaýy úshin alǵys bildirdi.
Mınıstr T.Dosmuhambetov QR Prezıdenti N.Nazarbaevtyń ál-Kýveıtke 1997 jylǵy resmı sapary kezinde negizi qalanǵan Qazaqstan men Kýveıt arasynda ekijaqty qarym-qatynastardyń ekpindi damyp kele jatqanyn aıta kelip, bıylǵy jyly josparlanǵan Astanaǵa Kýveıt Ámiri Sabah ál-Ahmad as-Sabahtyń alǵash memlekettik sapary eki dos el qatynastary tarıhynda mańyzdy oqıǵa bolyp sanalyp, olardy jańa sapaly deńgeıge kóteretinine senim bildirdi.
Óz kezeginde Azııalyq Olımpıada Keńesiniń Prezıdenti, Kýveıt Premer-Mınıstriniń ekonomıkalyq máseleler boıynsha orynbasary, damý jónindegi Memlekettik mınıstri sheıh Ahmed ál-Fahd as-Sabah Qazaqstandaǵy VII qysqy qurlyqtyq oıyndardy ótkizýge daıyndyǵyn joǵary baǵalady. AOK Prezıdentiniń oıynsha, bul mańyzdy shara Qazaqstannyń joǵary jetistikter sportyna baǵyttalǵan el retinde jańadan tanylýyn atap ótti.
Barshamyzǵa málim, 2007 jyldyń mamyrynda Astanada Azııalyq Olımpıada Keńesiniń Prezıdenti sheıh Ahmed ál-Fahd as-Sabah Elbasymyz N.Á.Nazarbaevty Azııa qurlyǵynda sportty damytýǵa sińirgien eńbegi úshin eń joǵarǵy ordenmen marapattaǵan bolatyn.
Qonaqtardyń aldynda qazaqstandyq estradanyń juldyzdary Maıra Muhamedqyzy, Qaraqat Ábildına, «Ulytaý» toby, «Sazgen sazy» folklorlyq ansambli, «Gúlder» bı toby óz ónerlerin kórsetti.
