Qazaqstan elshileri sheteldik ınvestorlardy izdeýge belsene kirispek
ASTANA. QazAqparat - QR Syrtqy ister mınıstrligi men «KAZAKH INVEST» ulttyq kompanııasy arasynda memorandýmǵa qol qoıyldy. Atalǵan qujat talaptaryna sáıkes qazaqstandyq dıplomattar ulttyq kompanııa ókilderine elimizge sheteldik ınvestıtsııa tartý jumystaryna kómek kórsetetin bolady, dep habarlaıdy QazAqparat.
«Qazirgi ýaqytta syrtqy saıası vedomstvo Úkimetimizdiń ekonomıkalyq blogymen jáne «KAZAKH INVEST» ulttyq kompanııasymen birlesip, ortaq jumys baǵytyn, ınvestıtsııa tartý men qazaqstandyq ónimdi sheteldik naryqta ilgeriletýdiń jańa sharalaryn naqtylaýda. SІM men «KAZAKH INVEST» arasynda qol qoıylǵan ózara túsinistik pen yntymaqtastyq memorandýmy Qazaqstanǵa tikeleı shetel ınvestıtsııasyn tartý jáne eksportty ilgeriletý máseleleri boıynsha ózara is-qımyldy kúsheıtýge baǵyttalǵan», - dedi qol qoıý rásiminen keıin QR SІM basshysy Qaırat Ábdirahmanov.
Onyń aıtýynsha, elimizdiń syrtqy saıasat vedomstvosy ulttyq kompanııaǵa sheteldik isker seriktestermen tikeleı jumys isteýge jáne shetelderde sáıkesinshe jumystar júrgizýge óz septigin tıgizetin bolady.
«Ol úshin Qazaqstannyń sheteldik mekemeleriniń barlyq áleýeti jumyldyrylady. Qazaqstannyń dıplomatııalyq ókildikteriniń birlesken jumysyn kúsheıtip, ulttyq kompanııanyń sheteldegi ókildikterin ashamyz. Jalpy, álemniń 90-nan astam memleketin qamtımyz», - dedi mınıstr.
Óz kezeginde «KAZAKH INVEST» AQ Basqarmasynyń tóraǵasy Maqsat Qabashev Qazaqstannyń shıkizat emes sektoryna ınvestıtsııa tartýǵa basa nazar aýdarylatyndyǵyn atap ótti.
«Biz kúsh-jigerimiz shoǵyrlandyrylatyn salalar men elderdi anyqtap aldyq. Salalar - bular aýyl sharýashylyǵy ónimderin qaıta óńdeý, hımııa jáne munaı hımııasy, farmatsevtıka, mashına jasaý, al jumys isteıtin elderimiz - Eýropalyq Odaq, Túrkııa, Taıaý Shyǵys, Qytaı, Reseı jáne AQSh. SІM-men birge zertteý júrgizýge ýaǵdalastyq. Olar qazirgi ýaqytta oryndaldy desek te bolady. Investor retinde qyzyǵýshylyq týdyratyn kompanııalardy aıqyndap aldyq. Sheteldegi ókildikter men elshilerdiń kómegimen atalǵan kompanııalardy Qazaqstanda jobalar ashýǵa shaqyratyn bolamyz», - dedi Maqsat Qabashev.
