Qazaqstan elordasynyń 150 turǵyny jańa qonys ıeleri atandy
ASTANA. Maýsymnyń 29-y. QazAqparat - Qazaqstan elordasynyń - Astananyń 150 turǵyny jańa qonys ıeleri atandy. Búgin olarǵa Memlekettik turǵyn úı qorynan bólingen páterlerdiń kiltterin Almaty aýdanynyń ákimi Sapar Ahmetov, Esil aýdanynyń ákimi Qaırat Jańabergenov, Saryarqa aýdanynyń ákimi Sábıla Mustafına tapsyrdy.
Turǵyn úıge ıe bolǵandardyń arasynda «Turǵyn úı qatynastary týraly» QR Zańyna sáıkes turǵyn jaǵdaıyn jaqsartý quqyǵyn paıdalanǵan jáne 1986-2000 jyldar aralyǵynda turǵyn úı basqarmasynda tirkelgen azamattar bar. Bul týraly Astana qalasy ákimi apparatynyń baspasóz baıanynda habarlandy.
Elbasy N.Á.Nazarbaevtyń tapsyrmasyna sáıkes Astanada halyqtyń áleýmettik áljýaz jikterin qoljetimdi jalǵa beriletin turǵyn úımen qamtamasyz etý sharalary belsendi júzege asyrylýda, sonyń arqasynda 2008 jyldan beri kezekte turǵan barlyq Uly Otan soǵysyna qatysýshylar men múgedekter úımen qamtamasyz etildi. Kóp balaly otbasylar men múgedekter otbasylary, bilim berý, densaýlyq saqtaý jáne mádenıet júıesiniń ókilderi, turmysy tómen azamattar, quqyq qorǵaý organdarynyń qyzmetkerleri turǵyn úı jaǵdaılaryn jaqsartty.
Memleket basshysy alǵa qoıǵan mindetterdi júzege asyrý úderisinde Qazaqstan elordasynda joǵary deńgeıdegi bilim, mádenıet jáne patrıotızmge ıe astanalyq turǵyndar ortasyn qurý, erekshe áleýmettik-mádenı orta qalyptastyrý Astana qalasynyń ákimdigi qyzmetiniń basymdyqty baǵyty bolyp tabylady.
Azamattardy memlekettik qordan jalǵa beriletin turǵyn úımen qamtamasyz etý baǵdarlamasy boıynsha qala ákimdigi jyl aıaǵyna deıin 1986 jyldan 2003 jylǵa deıin kezekte turǵyndardyń bárine úı berýdi josparlaýda. 2010 jylǵy maýsymnyń 23-indegi jaǵdaı boıynsha Astana qalasynda úıge muqtaj 17 612 azamat esepte tur.
