Qazaqstan elimizdiń azamattary Taılandtaǵy oqıǵa boıynsha aıypty emes degen ustanymǵa bekinip otyr - Syrtqy ister mınıstrligi
ASTANA. Jeltoqsannyń 21-i. QazAqparat /Rýslan Ǵabbasov/ - Qazaqstan elimizdiń azamattary Taılandtaǵy oqıǵa boıynsha aıypty emes degen ustanymǵa bekinip otyr. Bul týraly búgin Astanada ótken aptalyq brıfıngte Syrtqy ister mınıstrliginiń resmı ókili Erjan Ashyqbaev málim etti,
dep habarlaıdy QazAqparat.
«Bangkoktaǵy másele boıynsha jalpy Qazaqstannyń ustanymyna toqtalatyn bolsaq, Taıland úkimetiniń is-áreketteri tolyqtaı BUU Qaýipsizdik keńesiniń Soltústik Koreıaǵa qatysty tıisti rezolıýtsııalaryna saı kelip otyr. Biz ol jaǵynan eshbir daý kóterip otyrǵan joqpyz»,- dedi E. Ashyqbaev.
«Qazaqstan óz azamattarynyń aıypsyz ekenine senedi. Óıtkeni olar jaldamaly qyzmetkerler retinde, ıaǵnı osy ushaqtyń ekıpajy retinde búkil halyqaralyq júk tasymalynyń tájirıbesi men tıisti halyqaralyq konventsııalaryna sáıkes tasymaldanatyn júktiń ishindegi zattaryna jaýapty emes. Sondyqtan osy turǵydan alǵanda Qazaqstan azamattary bul oqıǵaǵa boıynsha aıypty emes degen ustanymǵa senemiz», - dedi resmı ókil.
Onyń aıtýynsha, halyqaralyq tıisti talaptarǵa sáıkes bul júkti jiberýshi mekeme jaýapty bolady. Al ekıpajdyń júkke esh qatysy joq.
«Qazirgi kezde Qazaqstannyń Bangkoktaǵy dıplomatııalyq mıssııasynyń qyzmetkerleri qamaýdaǵy elimizdiń azamattarymen kúndelikti habarlasyp, qajetti zattar men dári-dármekterdi jetkizip otyr»,-dedi E. Ashyqbaev.
Resmı ókil qazirgi kezde elimizdiń azamattaryn sotqa deıin kepildik arqyly shyǵaryp alý sharalary kózdelip otyrǵandyǵyn aıtyp ótti.
Budan buryn habarlanǵandaı, Bangkokta ustalǵan 4L-AWA nómirli Il-76 ushaǵy Grýzııanyń «Aır Vest Djordjıa LTD» kompanııasynyń atyna tirkelgen. Atalǵan ushaqty jańazelandııalyq «SP Treıdıng LTD» kompanııasy júk tasymaldaý úshin jalǵa alǵan. Ushaqtyń ekıpajyndaǵy 4 qazaqstandyq pen belarýstyq 1 azamatty «Aır Vest LTD» kompanııasy ushaqta qyzmet kórsetý úshin jaldaǵan jáne bul shara halyqaralyq normalarǵa sáıkes.
