Qazaqstan elektrolız zaýytynan suıyq alıýmınııdiń birinshi legi jóneltildi
ASTANA. QazAqparat - «Qazaqstan elektrolız zaýyty» AQ-da suıyq alıýmınııdi quıyp jóneltý sátti júzege asty. «Giessenhaus» JShS-na joldanǵan suıyq kúıdegi metalldyń birinshi legi shamamen bes tonnany qurady, dep habarlaıdy pavlodarnews.kz.
Bul týraly «Qazaqstan elektrolız zaýyty» AQ-nyń korporatıvtik kommýnıkatsııalar qyzmeti aqparat taratty.
«QEZ» AQ qospaly alıýmınıı shyǵaratyn kásiporynmen yntymaqtastyqty ótken jyldyń ortasynda bastaǵan. 2017 jyly «Giessenhaus» JShS-ne 170 tonnadan asa metall jóneltildi. Bul kezeńde ónimdi jóneltý bastapqy alıýmınııdiń quımasy túrinde júzege asqan bolatyn. Bıylǵy jyly Pavlodar óńirindegi jańa kásiporynǵa jóneltiletin metalldy suıyq kúıinde quıyp jóneltý josparlandy. Bul óz kezeginde «Giessenhaus» JShS-ke shyǵaratyn óniminiń ózindik qunyn tómendetýge múmkindik beredi.
Suıyq alıýmınııdi tasymaldaý úshin vakkýmdy shómish tehnologııasy ázirlendi. Ol tasymaldaý qashyqtyǵyna baılanysty metall temperatýrasyn saqtaıdy.
Jańa kásiporyn mamandarynyń sózinshe, metalldy jetkizý barysynda suıyq alıýmınıı bastapqy temperatýrasynan 20 gradýsqa salqyndaıdy. Al, alıýmınıı metalynyń bastapqy kezeńdegi balqytý temperatýrasy Tselsıı boıynsha 900 gradýsty quraıdy.
