Qazaqstan elektr qýatyn Aýǵanstan men Pákistanǵa satýdy josparlaýda
ASTANA. QazAqparat - Qazaqstan elektr qýatyn Aýǵanstan men Pákistanǵa satýdy josparlaýda. Bul týraly búgin Ortalyq kommýnıkatsııalar qyzmetinde QR Energetıka mınıstrligi elektr energetıka departamentiniń dırektory Baýyrjan Sársenov málim etti.
Onyń aıtýynsha, ol úshin Torǵaı jáne Ekibastuzda elektr stansalary salynýy tıis.
«Qazaqstannyń elektr júıeleriniń damý áleýetteriniń biri retinde Qytaıdyń ortalyq jáne shyǵys bóligine deıin 800 kılovolt turaqty toq jelisin tartý jobasy qaralýda. Qazaqstannyń elektr qýatyn eksportqa shyǵarý, sonyń ishinde Qytaıǵa satý maqsatynda Torǵaı jáne Ekibastuz aımaqtarynda jańa elektr stansalaryn salý kózdelýde. Sonymen qatar Ortalyq Azııa elderi - Qyrǵyzstan, Tájikstan jáne Ońtústik Azııa memleketteri - Aýǵanstan, Pákistandy qosatyn CASA-1000 jańa elektr júıesi salynyp jatyr. Bul jeli qysqy merzimderde Qazaqstan óziniń elektr qýatyn Qyrǵyzstan,Tájikstan elderine, ary qaraı Aýǵanstan men Pákistanǵa da satýyna múmkindik beredi. Bul ázirge joba retinde ǵana, biraq ony iske asyrsaq, Qazaqstannyń eksporttyq áleýeti arta túsedi», - dedi ol.
