Qazaqstan elektr energııasyn Túrkııa men Eýropaǵa eksporttaýdy josparlap otyr

ASTANA. QazAqparat – Qazaqstan elektr energııasyn Eýropaǵa tartý jobasyn pysyqtap jatyr. Bul týraly Astana halyqaralyq forýmynda Energetıka mınıstri Almasadam Sátqalıev aıtty, dep habarlaıdy QazAqparat tilshisi.

«Qazirgi kezde elektr enerııasy qýatyn jetkizý salasynda birinshi kezekte el aýmaǵyn tolyqtaı qamtamasyz etýge basa nazar aýdaryp otyrmyz. Sonymen birge biz osy baǵytta biregeı áleýetimizdi paıdalanyp, energııany Eýropaǵa da eksporttaýdy qarastyryp jatyrmyz. Ázerbaıjandaǵy áriptesterimizben joǵary qýatty kabeldi tartý boıynsha jańa jobany talqylaýdy bastadyq. Bul joba Qazaqstanǵa elektr energııasyn Túrkııaǵa, Eýropaǵa jetkizýge múmkindik berer edi», - dedi A. Sátqalıev.

Sonymen qatar vedomstvo basshysy Qazaqstan kómirdiń ornyna otyn retinde tabıǵı gazdy paıdalanýǵa nazar aýdaryp otyrǵanyn eske saldy.

«Taza otynnan óndirilgen elektr energııasy bizge eksporttyq preferentsııalar alýǵa yqpal jasaıtynyn jáne el ishindegi óndiristerge qajet energııany qamtamasyz etýge múmkindik beretinin túsinemiz. Tabıǵı gaz – kómir resýrstaryn almastyra alatyn otyn. Bizde osy baǵytta keshendi jospar bar. Sondyqtan strategııalyq seriktestermen osy jumystardy pysyqtap jatyrmyz. Josparlarymyzdy júzege asyrýdan eleýli nátıje bolady dep oılaımyz», - dedi mınıstr.