Qazaqstan elektr energetıkasy salasyndaǵy zııandy shyǵaryndyny 60-70% tómendetedi

NUR-SULTAN. QazAqparat – Qazaqstan elektr energetıkasy salasyndaǵy zııandy shyǵaryndylardy 60-70 paıyzǵa tómendetedi. Bul týraly ІІІ Kómir ónerkásibi forýmynda Ekologııa mınıstrligi klımattyq saıasat jáne jasyl tehnologııalar departamentiniń dırektory Oljas Aǵabekov aıtty, dep habarlaıdy QazAqparat tilshisi.

«Jalpy, elimizdiń kómirge táýeldiligi joǵary ekenin eskersek, energııa aýystyrý - biz úshin úlken syn-tegeýrin bolmaq. Degenmen, álemdik trendterdi, álemniń úlken jańalyqtar ashylýy aldynda turǵanyn kórip otyrmyz. Damý bolashaǵyn da baıqaımyz. Biraq, ekologııa, aýa raıy máselelerine baılanysty ózgeris bolady. Sondyqtan jańa stansalardyń qurylysyn qarastyrǵan kezde onyń qandaı otynmen jumys isteıtinin durys tańdaý óte mańyzdy», - dedi Turar Jolmaǵambetov.

Osy rette departament dırektory Ekologııa mınıstrliginiń Ulttyq ekonomıka mınıstrligimen birlesip, kómirtegi beıtaraptyǵy strategııasyn pysyqtap jatqanyn atap ótti.

«Orta eseppen alǵanda elimizde shamamen 2,5 mln tonna zııandy zattar shyǵarylady. Onyń 900 myń tonnasy elektr jáne jylý energetıkasy salalaryna tıesili. Osylaısha, atmosfera aýasyna teris áserdiń shamamen 30-40 paıyzy - elektr energetıkasy salasynyń úlesinde. Bizdiń baǵalaýymyzsha, osynaý 900 myń tonna zııandy shyǵaryndyny 60-70 paıyzǵa tómendetýge bolady. Bul - aldymyzǵa qoıyp otyrǵan bıik maqsat», - dedi komıtet tóraǵasynyń orynbasary.