Qazaqstan eldi mekenderiniń tótenshe jaǵdaılar kezinde habar alý múmkindigi joq - mınıstr
ASTANA. 11 qyrkúıek. QazAqparat - Qazaqstan eldi mekenderiniń tótenshe jaǵdaılar barysynda habar alý múmkindigi joq.
Búgin Úkimet otyrysynda Tótenshe jaǵdaılar mınıstri Vladımır Bojko osylaı málim etti.
«Statıstıka agenttiginiń málimetterine sáıkes, 2012 jyldyń basynda aýyl halqynyń sany 7,5 mln. adamdy nemese halyqtyń 45 paıyzyn quraıdy. Degenmen qazirgi qoldanystaǵy ortalyqtandyrylǵan qulaqtandyrý júıesi bastapqydan-aq beıbit jáne soǵys kezderinde iri qalalar men ónerkásip nysandaryna qyzmet kórsetýge arnalǵan ári aýyldyq eldi mekenderdi qamtymaıdy», - dedi ol.
Osy oraıda V.Bojko Qashaǵan, Teńiz, Qarashyǵanaq syndy munaı jáne gaz ken oryndaryna taqaý ornalasqan eldi mekenderde alańdaýshylyq tanytatyndyǵyn basa aıtty. Onyń sózine qaraǵanda, osy aımaqtarda ornalasqan aýyldardy tehnogendik sıpattaǵy tótenshe oqıǵalar oryn alǵanda qulaqtandyratyn múmkindikter joq.
«Zamanaýı ómir shyndyǵyn eskersek, mundaı jaǵdaıǵa jol bermeýimiz kerek dep sanaımyn», - dedi mınıstr.
